پی آئی اے نوں16دناں وچ ساڑھے 8ارب روپے دا نقصان

لہور(پنجابی میڈیا گروپ) پی ایس او توں ایندھن نہ ملن پاروں قومی ایئر لائن نوں 16دناں وچ ساڑھے 8 ارب روپے دا نقصان ہوچکیا اے۔پی آئی اے دی اج وی ملک بھر وچ18پروازاں منسوخ کیتیاں گئیاں۔کراچی توں جان تے آنے والیاں2 طرفہ 12 پروازاں منسوخ کیتیاں گئیاں۔ کراچی توں اسلام آباد دیاں دو طرفہ 4 پروازاں، کراچی توں لہور دیاں دو طرفہ 4 پروازاں، کراچی توں لہور دی پی کے 302 تے لہور توں کراچی 303، کراچی توں فیصل آباد دیاں دو طرفہ پروازاں پی کے 340 تے پی کے 341، پی آئی اے دی کراچی نال مسقط دیاں دو طرفہ پروازاں منسوخ کیتیاں گئیاں۔کراچی توں سوئی جان والی پرواز پی کے 155 دو گھنٹے تاخیر نال دوپہر 12 وجے شیڈول کر دتی گئی جدکہ پشور ایئرپورٹ توں پی آئی اے دی دبئی، ابو ظہبی تے شارجہ دیاں پروازاں منسوخ کیتیاں گئیاں۔پی آئی اے ترجیحی پروازاں لئی پی ایس او توں ایندھن کیش اُتے لے کے فلائٹ چلا رہیا اے۔ ہُن تک16دناں وچ پی آئی اے دیاں منسوخ کیتیاں جان والیاں مجموعی پروازاں 340ہوگئیاں۔