منظوری توں پہلاں ہی ترقیاتی بجٹ وچ250ارب دی کٹوتی

اسلام آباد( بیورورپورٹ)وفاقی حکومت نے آئندہ مالی سال 25-2024 دے وفاقی بجٹ دی پارلیمنٹ نال منظوری توں پہلاں ہی ترقیاتی بجٹ وچ 250 ارب دی کٹوتی کردتی۔ایس بارے وفاقی وزیر منصوبہ بندی احسن اقبال نے وفاقی ترقیاتی پروگرام وچ 250 ارب روپے کٹوتی دی تصدیق کر دیاں ہو یاں دسیا کہ نویں پروگرام لئی حکومت نوں انٹرنیشنل مانیٹری فنڈ (آئی ایم ایف ) دی کڑیاں شرطاں دا سامنا اے۔احسن اقبال دا کہنا سی کہ خسارا پورا کرن لئی کلہاڑی کِدھرے پینی سی تے اوہ ترقیاتی بجٹ اُتے پئی اے، اونہاں دا کہنا سی کہ ساڈھے سامنے پہاڑاں دے انبار نیں، غربت و جہالت دا پہاڑ اے، وسائل دے ناں اُتے صرف دی غلیل اے جس نال مقابلہ کررہے ہاں، 1400 ارب روپے دی پی ایس ڈی پی ہُن 1150 ارب رہ گئی اے۔اونہاں نے آکھیا کہ معاشی صورتحال ایسی اے کسی دی وی حکومت ہپندی تے چوائساں نہ ہُندیاں، معاشی مسائل نال نمٹن لئی ریسورس موبلائزیشن کرنی اے۔وفاقی وزیر منصوبہ بندی دا کہنا سی کہ ترقیاتی بجٹ دی قربانی دا مقصد عوام تے زراعت نوں ہور ٹیکساں توں بچانا اے، اونہاں نے ہور آکھیا کہ اگلے مالی سال جائزہ لے کے ترقیاتی بجٹ وچ ودھا کیتا جاسکدااے۔