چوہدری اورنگزیب، صحافت دی کہکشاں دا ابھردا ہویا روشن ستارہ

کاروبار نال سیاست تے ہن صحافت تیکر خدمت دا جذبہ ایہناں دا نصب العین اے، خصوصی رپورٹ

چوہدری اورنگزیب نے کاروبار شروع کیتا تے اپنا اک منفرد تاثر چھڈن وچ کامیاب رہے۔ ایس شہر بے مثل لہور نوں مزید خوبصورت تے جدید بنان وچ ایہناں دے کردار توں انکار ممکن نہیں کہ الکبیر ٹائون کجھ ای ورھیاں وچ ہائوسنگ انڈسٹری دا اک نمایاں ناں بن چکیا اے۔ چوہدری اورنگزیب دی کاروباری حکمت عملی سادہ ضرور اے پر اوہ جدت اُتے یقین رکھدے نیں جس دی مثال ایہناں دا ایہہ منصوبہ اے جس دے اوہ چیئر مین نیں تے ایہہ شہر دی پرائم لوکیشن اُتے ہائوسنگ دے نمایاں تے کامیاب ترین منصوبیاں وچوں اک اے۔ حقیقت پر ایہہ وی اے کہ کاروبار چوہدری اورنگزیب دی شخصیت دا محض اک رُخ اے۔ اوہ قوم دی خدمت دے جذبے اُتے غیر متزلزل یقین رکھدے نیں تے کاروبار وی عبادت تے عوامی خدمت دے جذبے نال سرشار ہو کے ای کردے نیں جس پاروں ایہناں دا شمار ہائوسنگ انڈسٹری دی انج دی منفرد شخصیات وچ ہوندا اے جنہاں نے اپنے آپ نوں تنازعیاں توں دور رکھیا اے۔ چوہدری اورنگزیب دی اک ہور پہچان ایہناں دی سیاست اے تے سیاست دا مطلب ای عوام دی خدمت اے۔ اوہ اگرچے موروثی سیاست دان نہیں تے ایہناں دا کسے سیاسی خانوادے نال وی کوئی تعلق نہیں پر خدمت دا جذبہ ای اے کہ اوہناں نے سیاسی جماعت پاکستان تحریک اتحاد دی بنیاد رکھی تے جدوں سیاسی سفر دا آغاز کیتا تے ایہناں دے قافلے وچ اوہ لوک شامل ہوندے گئے جیہڑے نعریاں اُتے نہیں بلکہ عمل اُتے یقین رکھدے سن۔ اوہناں نے تبدیلی دا منصوعی نعرہ اُچا نہیں کیتا بلکہ خدمت دے جذبے نال سرشار ہو کے اگے ودھے جس پاروں کجھ ای ورھیاں وچ چوہدری اورنگزیب دا شمار معتبر سیاسی فکر و سوچ رکھن والے کجھ سیاست داناں وچ ہون لگیا جنہاں دا دامن ہر طرح دے الزامات توں پاک اے تے اوہ وطن دی محبت وچ کوئی وی قربانی دین لئی ہمہ وقت تیار رہندے نیں جس دی اک مثال ایہہ وی اے کہ اوہناں نے جنگ ستمبر دے شہدا تے غازیاں نال اظہار یکجہتی کرن لئی الکبیر ٹائون فیز 2 توں کڈی گئی ریلی دی قیادت کیتی جس وچ کاروباری شخصیات دے علاوہ شہریاں دی اک وڈی تعداد شریک ہوئی۔ اوہناں نے ایس ریلی نال ولولہ انگیز خطاب کردے ہوئے شہدائے جنگ ستمبر نوں زبردست نذرانہ عقیدت پیش کیتا تے وطن لئی ہر طرح دی قربانی دین دے عزم دا اعادہ کیتا۔
چوہدری اورنگزیب دا کاروبار توں شروع ہون والاایہہ سفر خدمت دے جذبے اُتے یقین دی اک انج دی مثال اے جیہڑی انفرادیت دی حامل ہون دے علاوہ غیر معمولی وی اے کیوں جے خدمت دا جذبہ وکھا کے کیتا جائے تے ایہہ اپنا مفہوم کھو دیندا اے۔ چوہدری اورنگزیب ایسے اصول اُتے گہرا یقین رکھدے نیں جس پاروں ذاتی تشہیر ایہناں لئی کوئی معنی نہیں رکھدی بلکہ اوہناں نے ہمیشہ اپنی پوری توجہ عوامی خدمت تے فلاح دے منصوبیاں اُتے رکھی اے۔
چوہدری اورنگزیب نے اپنی زندگی دے جس سفر دا آغاز کاروبار نال کیتا سی تے اوہ وی اک انج دا کاروبار جیہڑا وطن عزیز وچ کرنا آسان نہیں، اوہناں نے میدان نہیں چھڈیا بلکہ کجھ پیر اگے ودھے تے سیاست نوں عبادت دا درجہ تے خدمت دا ذریعہ خیال کردے ہوئے اک انج دے پرخار رستے دا چنائو کیتا جس اُتے اگے ودھنا آسان نہیں سی، جذبہ مگر جواں ہو تو کچھ بھی ناممکن نہیں۔
چوہدری اورنگزیب نے سیاست دے بعد صحافت دے اک انج دے سفر دا آغاز کیتا اے جیہڑا کاروبار تے سیاست توں قدرے مشکل اے ایہہ اک انج دا سفر اے جس اُتے اگے ودھنا کسے طور آسان نہیں سی۔ اوہ میڈیا نیوز دے ناں توں اخبار دا اجرا کر چکے، اوہناں نے تن دہائیاں توں شائع ہون والے ایس اخبار نوں نویں رنگ ڈھنگ تے جدید تقاضیاں دے مطابق شائع کرن دے عزم دا اظہار کیتا اے جنہوں ایہناں لفظاں وچ بیان کیتا جا سکدا اے کہ خدمت وچ ای عبادت اے۔ چوہدری اورنگزیب دے شعبہ صحافت نوں اختیار کرن دا مقصد قطعاً اپنی سیاست یا کاروبار دا فروغ نہیں بلکہ اوہ عوامی خدمت دے جذبے نال سرشار ہر میدان وچ کامیابی دے نال اگے ودھ رہے نیں جس پاروں ایہناں دے سیاسی تے کاروباری حریف وی ایہناں دی صلاحیتاں دے معترف ہو چکے نیں۔ شائستہ مزاج چوہدری اورنگزیب پاکستانی صحافت دی کہکشاں وچ یقینا اک انج دا ابھردا ہویا روشن تارہ نیں جس دی روشنی نال عام بندا حقیقتاً منور ہوئے گا۔

اوہ جرات مند تے بے باک صحافی ہون دے علاوہ تخلیق دی دنیا دا معتبر حوالہ نیں
اسیں اہلِ پنجاب مدثر اقبال بٹ دے مقروض آں: چوہدری اورنگزیب
پنجاب دے سارے رنگاں نوں محفوظ بنان لئی اوہناں نے گراں قدر خدمات انجام دتیاں

پنجابی میڈیا گروپ دے سربراہ مدثر اقبال بٹ کسے تعارف دے محتاج نہیں تے روزنامہ میڈیا نیوز لاہور وچ ایہناں دا کردار اک انج دے سالار دا اے جس دی حکمت و تدبر کامیابی دی ضمانت ثابت ہوندی اے۔ اوہ صحافت دا اک انج دا معتبر حوالہ نیں جنہاں دا 40 سال اُتے محیط صحافتی کیریئر نڈر تے جرات مندانہ صحافت دا عکاس اے۔ اوہناں نے اک کارکن صحافی توں اپنے صحافتی سفر دا آغاز کیتا۔ حقیقت پر ایہہ وے کہ مولانا ظفر علی خان جہی شخصیت دا اثر ایہناں دی شخصیت اُتے واضح طور اُتے محسوس کیتا جا سکدا اے کہ دونویں ای گوجرانوالہ دے نواحی شہر وزیرآباد نال تعلق رکھدے نیں۔ مدثر اقبال بٹ دی جارحانہ طرزِ صحافت نے ایہناں نوں اپنے ہم عصراں وچ نمایاں کیتا جد کہ ایہناں دی شخصیت دا اک پوشیدہ پہلو ایہہ وی اے کہ اوہ روایت توں ہٹ کے تجربات توں گریز پا نہیں ہوندے۔ اوہناں نے پنجابی اخبار بھلیکھا دے اجرا دا سوچیا تے ایس خواب نوں وی پورا کرن وچ زیادہ لیت و لعل نال کم نہیں لیا۔ لہور پنجاب دا صوبائی دارالحکومت اے، حقیقت پر ایہہ وے کہ ایس دھرتی توں پنجابی دے کجھ اخبار نکلے پر زیادہ عرصہ نہیں چل سکے۔ مدثر اقبال بٹ نے ثابت قدمی دا مظاہرہ کیتا تے بھلیکھا نوں پنجاب دھرتی دا کامیاب تے مقبول ترین اخبار بنان وچ کامیاب رہے۔ اوہناں نے کجھ ورھے پہلاں بھلیکھا دے ناں توں یوٹیوب چینل وی شروع کیتا جیہڑا وطن عزیز وچ اپنی نوعیت دا باغیانہ تجربہ قرار پا سکدا اے۔ اوہ بھلیکھا نوں کامیاب بنان لئی پرعزم نیں۔ ایس وچ کوئی شبہ نہیں کہ اوہ پنجاب دھرتی تے رہتل دا مان نیں، اوہ ایس دھرتی دےپتر نیں تے ایہہ یقین رکھدے نیں کہ ایس دھرتی دا قرض چکانا ایہناں اُتے واجب اے جس دا اعتراف اوہ سارے لوک کردے نیں جیہڑے ایہناں توں ذاتی شناسائی رکھدے نیں تے ایہناں دی تحریراں تے پنجابی ادب دے فروغ لئی ایہناں دی کاوشاں دا ادراک رکھدے نیں جنہاں وچ روزنامہ میڈیا نیوز لاہور دے چیف ایگزیکٹو چوہدری اورنگزیب وی شامل نیں جنہاں نے ایہہ کہیا:
دنیا دے ہر ملک وچ ماں بولی نوں ترجیح دتی جاندی اے پاکستان دے چارے صوبیاں وچ وی لوک مادری زبان نوں اہمیت دیندے نیں پر اہل پنجاب دی اپنی زبان توں بے رُخی پریشان کن اے۔ اوہناں نے ایس تناظر وچ پنجابی میڈیا گروپ دیاں کاوشاں نوں سراہندے ہوئے کہیا کہ ایہہ موجودہ ویلے دی لوڑ اے کہ پنجاب دے حقوق دی گل کیتی جائے۔ اوہناں نے کہیا کہ پنجابی میڈیا گروپ پنجابی دا اک وڈا تحقیقی ادارہ اے جس وچ ہن پنجاب دے ورثے نوں محفوظ بنان لئی پنجابی دی پہلی تے جدید ترین آڈیو ویڈیو لائبریری وی قائم کیتی جا رہی اے تے اسیں استادِ محترم مدثر اقبال بٹ دے نال مل کے پنجابی زبان و ادب نوں فروغ دین لئی کوشاں آں تے ایس مقصد لئی کم کرن والیاں دی ہر طرح نال مدد کراں گے۔ اوہناں نے کہیا کہ مدثر اقبال بٹ پنجابی دھرتی دا مان نیں تے اسیں اہلِ پنجاب ایہناں دے مقروض آں کہ جو کجھ اوہناں نے ایس دھرتی دی رہتل، ایس دے ہیروز، تہواراں، ادب فنون لطیفہ تے طرز زندگی نوں محفوظ بنان لئی کیتا اے ایس دی ماضی وچ کوئی دوجی مثال نہیں ملدی۔

باقی، روزنامہ میڈیا نیوز دا کامیاب اجرا

میری خواہش سی تے میرے ایس شوق نوں مینوں میرے وڈے بھراواں وانگوں عزیز مدثر اقبال بٹ نے حقیقت بنایا۔ میں اگرچے ادارے دا چیف ایگزیکٹو واں پر اپنے آپ نوں صحافت دا طالب علم ای خیال کرنا واں۔اوہناں نے کہیا کہ میڈیا نیوز صحافت دی دنیا وچ اک خوبصورت وادھا اے جیہڑا ہمیشہ حق تے سچ دی اواز بلند کرے گا۔
لیجنڈ صحافی تے صدر چیئرمین پنجابی میڈیا گروپ مدثر اقبال بٹ نے تقریب نال خطاب کردے ہوئے کہیا:
میدان صحافت وچ اک چنگے اخبار دی بوہت شدت نال ضرورت محسوس کیتی جا رہی سی تے روزنامہ میڈیا نیوز صحافت دی دنیا وچ اک بیش بہا وادھا ثابت ہوئے گا کیوں جے ایس دا مقصد کاروبار کرنا نہیں، اوہناں نے کہیا کہ اسیں منزل ول سفر شروع کر دتا تے منزل پان وچ زیادہ دیر نہیں لاواں گے۔ مدثر اقبال بٹ نے کہیا کہ ایہہ تاثر غلط طور اُتے فروغ دتا جا رہیا اے کہ صحافت کاروبار اے بلکہ ایہہ عبادت اے تے روزنامہ میڈیا نیوز وچ صحافت دے نال عبادت دا رنگ وی نظر آئے گا۔
پنجابی میڈیا گروپ دے صدر تے سینئر صحافی ندیم رضا نے اپنے خطاب وچ کہیا:
انسان لئی میراث وچ عزت دا ہونا اہم اے، دولت تے شہرت انسان اپنی محنت نال کما سکدا اے۔ چوہدری اورنگزیب تے مدثر اقبال بٹ دونواں دوستاں نے دولت تے شہرت اپنی محنت تے جہدِ مسلسل نال حاصل کیتی اے۔ اوہناں نے اک فرانسیسی فلسفی دا حوالہ دیندے ہوئے کہیا کہ ایس نے بادشاہ دے سوال دے جواب وچ کہیا سی کہ میں دولت تے شہرت اپنی محنت نال کمائی اے۔
معروف کاروباری شخصیت تے ہائوسنگ سیکٹر نال جڑے میاں مبشر سعید نے اپنے خطاب وچ ایس امید دا اظہار کیتا:
میڈیا نیوز بوہت جلدی اسمان دیاں بلندیاں ول جائے گا کیوں جے ایس دا مقصد پیسہ کمانا نہیں بلکہ دنیا دے ساہمنے پاکستان دا مثبت امیج اُجاگر کرنا اے تے ایسے وجہ نال چوہدری اورنگزیب نے اپنی سیاسی جماعت دا ناں وی پاکستان تحریک اتحاد رکھیا اے، اوہ امت مسلمہ تے پاکستانی قوم نوں متحد کرن دا مشن لے کے چلے نیں۔ ایہناں دے نال ایہناں لوکاں دیاں دعاواں وی نیں جنہاں لئی اوہناں نے سستے گھر بنا کے ایہناں نوں ایہناں دی اپنی چھت فراہم کیتی۔
معروف کاروباری شخصیت ڈاکٹر سبیل اکرام نے کہیا:
چوہدری اورنگزیب دی قیادت وچ میڈیا نیوز دا اجراء صحافت دی دنیا وچ نویں رحجانات متعارف کروائے گا جس دا مقصد پاکستان دا مثبت تے حقیقی چہرہ دنیا دے ساہمنے لیانا اے۔
تقریب دے شرکا وچ پنجابی زبان دے بے مثل شاعر بابا نجمی،احمد رضا وٹو،قاضی طارق عزیز،قاضی اسد،نجم قدیر، خرم شہزاد،نبیل کیانی، قاری یونس، وقاص میکن،حافظ حیدر، چوہدری ندیم، کرنل پرویز سنے مختلف شعباں دی ممتاز شخصیات نے شرکت کیتی۔ تقریب دے اختتام اُتے روزنامہ میڈیا نیوز لاہور دی کامیابی لئی دعا کیتی گئی تے تقریب دے شرکاء نے چیف ایگزیکٹو میڈیا نیوز تے چیئر مین پنجابی میڈیا گروپ نوں روزنامہ میڈیا نیوز لاہور دے کامیاب اجراء اُتے مبارکباد پیش کیتی تے اپنے تاثرات دا اظہار کردے ہوئے کہیا:
ایس تقریب وچ شرکت ساڈے لئی باعثِ فخر و انبساط اے کہ اسیں پنجابی میڈیا گروپ دی سرپرستی وچ اک اردو اخبار دی تقریب وچ شریک ہوئے تے تہہ دل نال ادارے دی کامیابی لئی دعا گو آں۔