ہندوستان وچ مسلماناں دی حالت زار

ہندوستان وچ مسلماناں دے نال روارکھیا جان والا سلوک کدی وی کسے کولوں لکیا نہیں رہیا۔ 1947 وچ قیام پاکستان مگروں ہندوستان وچ رہ جان والے مسلماناں دے نال ہمیشہ ظلم تے زیادتی ہوندی رہی اے۔ ہندو مسلم فسادات تے اک معمولی جئی گل اے۔ اوہناں وچ وقفہ تے آندا رہندا اے مگر ایہہ کدی مستقل طور تے رکے نہیں۔ جدوں وی مسلم کش فسادات ہوندے نیں اوہناں وچ ہندوستان دی حکومت دا بالواسطہ یا بلاواسطہ کردار رہیا اے۔ بالخصوص انتہا پسند ہندوجماعت بی جے پی دے برسراقتدار آن مگروں تے ظلم و ستم دا ایہہ سلسلہ تواتر دے نال جاری رہندااے۔نریندر مودی تے ویسے وی مسلم دشمنی وچ ہمیشہ پیش پیش رہیا اے۔ بطور وزیراعلیٰ گجرات اوہدے دور حکومت
وچ صوبہ گجرات وچ بدترین فسادات ہوئے جہدے وچ سینکڑاں مسلماناں نوں بے دردی نال شہید کیتا گیا جد کہ ا وہناں دے گھراں نوں مسمار تے دوجی جائیداد بشمول کاروبار تباہ کر دتے گئے۔ ایہناں فسادات وچ مودی تے اوہدی جماعت دے کجھ سرکردہ رہنماواں دے نام وی سامنے آئے مگر کسے دے خلاف وی کوئی کارروائی نہیں کیتی گئی۔چیتا رہوے ہندوستان وچ مسلماناں دی تعداد 20کروڑ توں وی ودھ اے جہڑی کہ مجموعی آبادی دا تقریباً17فیصد بندے نیں۔ عام انتخابات وچ مسلماناں دے ووٹ کسے وی جماعت نوں جتوان یا ہران وچ فیصلہ کن کردار ادا کر سکدے نیں مگر ووٹ لین مگروں اوہناں دی قدر کوئی نہیں کردا۔
مسلماناں دے نال ہون والا ظلم صرف جانی نقصان تک محدود نہیں بلکہ ہر شعبہ زندگی وچ اوہناں دے نال ناانصافی ہوندی رہندی اے۔ اوہ ملازمتاں دا حصول ہووے یا فیر اسمبلی وچ نمائندگی دا مسلماناں دے کاروبار تباہ کر دتے جاندے نیں۔ اوہناں دی عزتاں محفوظ نہیں ، یعنی اوہناں لئی زندگی اجیرن بنا کے رکھ دتی گئی اے۔ ایتھے ایہہ امر قابل ذکر اے کہ باوجود ایس ناانصافی تے ظلم و ستم دے مسلماناں نے زندگی دے ہر شعبے وچ ہندوستان دی ترقی وچ اپنا بھرواں تے اہم کردار ادا کیتا اے۔ اوہناں دی ایہناں خدمات دی کدی وی قدر نہیں کیتی گئی۔ بے جے پی دا تے نظریہ ای انتہا پسندی تے مسلم دشمنی اتے محیط اے جہدی وجہ نال پچھلے اٹھ سال توں جدوں توں نریندر مودی برسراقتدار اے مسلماناں دے نال زیادتیاں دے واقعات ہن معمول دی گل اے۔ بی جے پی دے اہم رہنما براہ راست طور تے ایہناں واقعات وچ ملوث نظر آندے نیں۔ اتر پردیش جہڑا کہ آبادی دے لحاظ نال ہندوستان دا سب توں وڈا صوبہ اے تے اوتھے سب توں ودھ تعداد وچ مسلمان آباد نیں اوتھے حال ای وچ ہون والے اسمبلی انتخابات وچ اک وی مسلمان نوں بی جے پی دا ٹکٹ نہیں دتا گیا۔ ایس توں ایہہ گل واضح ہو جاندی اے کہ نریندر مودی مسلماناں نوں کسے وی اہمیت والی جگہ اتے نہیںویکھنا چاہندا۔
مسلماناں نوں نماز دی ادائیگی توں روکنا’ اوہناں دے مذہبی مقاماں دی بے حرمتی کرنا مسلمان زنانیاں نوں حجاب پان
توں زبردستی روکنا تے گوشت دے کاروبار توں جڑے مسلماناں نوں زبردستی ایس کم توں روکن جئے واقعات ہن اک عام جئی گل اے۔ مسلمان اکثریت والے علاقیاں وچ غیر مسلم اہلکار تے آفیسر تعینات کر کے زبردستی ایس ایجنڈے اتے عمل کیتا جا رہیا اے۔ مقبوضہ کشمیر دے مسلماناں دے نال مسلسل روا رکھیا جان والا سلوک ہن ساریاں دے سامنے اے۔ مسلماناں نال جڑے علاقیاں دے تریخی تے صدیاں پرانے نام تبدیل کیتے جا رہے نیں۔ ملازمتاں وچ اوہناں دا کوٹہ ختم کیتا جا رہیا اے تے اوہناں نوں ایہہ احساس دوایا جا رہیا اے کہ اوہ دوجے درجے دے شہری توں وی بدتر نیں۔ پچھلے دناں حکمران جماعت بی جے پی دے دو رہنمانواں نے نبی مکرم حضرت محمدۖ دی ذات اقدس دے بارے انتہائی نازیبا الفاظ بولے جہناں دی جہنی وی مذمت کیتی جاوے اوہ گھٹ اے۔ پاکستان سنے دنیا بھر توں ایس فعل دے خلاف بھرواں ردعمل ایا مگر ہندوستان دے رویے وچ کوئی فرق نہیں آیا۔ ایہدے خلاف ہندوستان دے طول و عرض وچ وی احتجاج تے مظاہریاں دا اک سلسلہ شروع ہو گیا۔ ایس احتجاج نوں کچلن لئی بدترین ریاستی ات گردی دا مظاہرہ کیتا گیا۔ مسلمان بالاں تے بچیاں دے خلاف ریاست دی بھرویں طاقت دا استعمال کیتا جا رہیا اے اوہناں دے گھر مسمار کیتے جا رہے نیں۔ کاروبار تباہ کیتے جا رہے نیں۔ کئی لوک جان دی بازی وی ہار چکے نیں۔ انسانی حقوق دی تنظیماں ایس معاملے اتے اپنی آواز وی چک رہیاں نیں جد کہ چند مسلمان ملک بشمول پاکستان ولوں وی ہندوستان دی حکومت نوں شدید تنقید دا نشانہ بنایا جا رہیا اے مگر نریندر مودی تے اوہدی حکومت ٹس توں مس ہون نوں تیار نہیں۔
دوجے پاسے مقبوضہ کشمیر جئے مسلمان اکثریت والے علاقے وچ وی اک باقاعدہ منصوبہ بندی دے تحت مسلماناں دی اکثریت نوں اقلیت وچ تبدیل کیتا جا رہیا اے تاںجے اوتھے وی اک ہندو وزیراعلیٰ مسلط کیتا جاسکے۔ بدنصیبی دی گل تاں ایہہ ہے کہ ایس ظلم و جبر دے ماحول وچ کجھ ضمیر فروش مسلمان سیاستدان تے دانشور وی ذاتی مفاد لئی ہندوستان دی انتہا پسند حکومت دے آلہ کار بنے ہوئے نیں۔ اسلامی دنیا نوں بالخصوص تے اقوام عالم نوں بالعموم ایس ظلم تے زیادتی دے خلاف بھرویں آواز چکنی چاہیدی اے بصورت دیگر اک انسانی المیہ جنم لے سکدا اے۔