غزل

ڈاکٹر رزاق شاہد

آسے پاسے جدھر ویکھاں
رت وچ ڈبے منظر ویکھاں
موم دی بیڑیخ آل دوالے
اگ دا اک سمندر ویکھاں
بوہے بوہے ڈین کھلوتی
چہرے چہرے تے ڈر ویکھاں
پتراں ہتھوں لیراں لیراں
دھرتی ماں دی چدر ویکھاں
ہر تھاں موت نے گھاتاں لائیاں
کنج پرنیندی سدھر ویکھاں
انہونی کیہا نھیر مچایا
بُک بُک روندے پتھر ویکھاں
اندرو اندری ڈھیندا جاوے
جیون بن دا کھنڈر ویکھاں
رج سمے دے شاواشے وئی
بھُکھاں نچدیاں گھر گھر ویکھاں
جے تعبیر ملے تے جانا
سُفنے تے انج اکثر ویکھاں
اپنے لہو نال بال کے شاہد
دیوا اک راہ تے دھر ویکھاں