چوہدری شوگر ملز، نوازشریف دے بھتیجے یوسف عباس نے درخواست ضمانت دائر کر دتی

لہور: چوہدری شوگر ملز منی لانڈرنگ وچ گرفتار سابق وزیراعظم نوازشریف دے بھتیجے یوسف عباس نے ہائی کورٹ وچ درخواست ضمانت دائر کر دتی۔

دائر درخواست وچ چیئرمین نیب، ڈی جی نیب تے تفتیشی افسر نوں فریق بنایا گیا اے، درخواست گزار نے موقف اپنایا اے شریف فیملی اک کاروباری خاندان اے تے قنون دی حکمرانی تے یقین رکھدا اے، درخواست گزار نوں نیب چوہدری شوگر مل منی لانڈرنگ انکوائری وچ گرفتار کیتا۔ درخواست وچ آکھیا گیا اے چوہدری شوگر ملز سنے شریف فیملی دے دوجے کاروبار تے جی آئی ٹی نے 10جلداں تے مشتمل رپورٹ سپریم کورٹ وچ پیش کیتی، نیب نے 19جولائی 2019نوں کال اپ نوٹس گھلیا جہدا پورا جواب دتا جد کہ 8اگست نوں میاں نوازشریف نوں کوٹ لکھپت جیل ملن گیا تے نیب نے گرفتار کر لیا۔

درخواست گزار دا کہنا اے نیب دی حراست وچ 48دن جسمانی ریمانڈ تے رہیا پر کوئی شواہد عدالت پیش نہیں کیتے گئے، نیب نے 410ملین دی رقم دا الزام لایا جد کہ ایہدا سارے ریکارڈ موجود اے تے ساری رقم بینکنگ چینل توں پاکستان آئی تے ایہدے تے ٹیکس وی دتا۔ درخواست وچ استدعا کیتی گئی اے عدالت درخواست ضمانت بعد از گرفتاری منظور کرے۔