سوچن جوگ

عزمی منصور

دو گھڑیاں لئی
گَوہ کرنا جی
فیر بے شک دی
جنے مرضی آزادی دے جشن منائونا
پہلاں سوچو!
اس دھرتی تے
حق داراں نوں
حق ملدا اے؟
پہلاں سوچو!
مظلوماں دے ہاڑے سُن کے
ظالم نوں کوئی پُچھدا اے؟
پہلاں سوچو!
عزت، غیرت ہر بندے دی
کِنی کُو محفوظ ہے ایتھے؟
پہلاں سوچو!
نفرت ، کرودھ مُکا بیٹھے آں
اپنی مَیں نوں
ہتھیں مار مُکا بیٹھے آں؟
اپنیاں اپنیاں جَتھے بندیِاں
کولوں جے کر
ہو گئے آں آزاد
سچ دی گل کرن تے جے کر
جِیبھاں وِڈھیاں جاندیاں نہیں
سر دی پگڑی
پیراں دے وچ
جے کر رولی جاندی نہیں
بندوقاں دے پہرے رَبّ دے
گھر دے اگیوں چُکے گئے نیں
عزت ، مان تے آدر
ہر وسنیک نوں پورا مِلدا اے
فیربے شک دی
جِنے مرضی ، جشن منائو
لُڈیاں نالے بھنگڑے پائو