وسدا جھنگ

حاجی ملک عبداللطیف شیدائی

تساں ویکھیاں اج دیاں یاریاں نئیں ویکھے کل دے سنگ
پچھ انہاں توں اس دیاں چڑتلاں‘ جنہاں وسدا ویکھیا جھنگ
جدوں جشن بہاراں ہووناں‘ سارے جھنگ پوناں پلٹی
بڈھے ٹھیہریاں لازمی جاوناں‘ بھاویں جاون ہا گھسٹی
دینہاں کوڈیاں تے پڑ کوڈیاں‘ راتیں ویکھنا گھوڑا ڈانس
لکھاں ہوون ہا مجبوریاں‘ اساں مِس نہ کرناں چانس
انج مارنی دھریس دھریساں‘ پنجاب کریندائی ریس
جدوں مارن ہا بنھ پالیاں‘ ایہہ چپٹھیاں نال دھریس
پھدھ انگلیں ونج کے ویکھناں‘ مڑ باوی پھگن دا سنگ
جھٹ پھٹیاں موت دسیونی‘ سانوں پھوٹیاں لیناں ٹنگ
مہرے اٹھاں تے جنجوں چڑھنیاں‘ رج ڈھولیاں کٹنیں ڈھول
سنب چھنب کے بہناں میلوآں‘ بس اوہ نہ وقت پھرول
مجھ رتیاں لال خشابنیں‘ پیریں کھسے تلے گچ
ہس ہس کے ہووناں دوہریاں‘ مڑ ہاسے ونجنے پچ
ہتھ مونہہ چا سادہ دھووناں‘ ہائی میک اپ ادن مساگ
نوشہو دیاں لوڈیاں سالیاں‘ جھمی تان کے لینے لاگ
چڑ کوٹھے اُتے چھوہریاں‘ انج ڈھول دی لینی چس
وٹے لنگھدی جنج نوں مارنیں‘ اگوں جانجیاں پوناں ہس
کدوں ونجناں ہے شاہ جیونے‘ صدی وانگوں لگنا سال
دس پونی جدوں وساکھ دی‘ ڈھڈھ ہونا بیلیاں نال
شامی ڈیوا چڑھدا ویکھناں‘ دھمی کھیڈاں تے کھڈکار
میرے کناں وچ پئے گونجدن‘ اجاں ہاسیاں دے کڑکار
میں گامن کدوں وساریائے‘ اللہ بخش وی مینوں یاد
رو رو کے اکھیاں سجنیاں‘ جدوں بندا ہا فرہاد
جاہ جاہ تے مزرعے ہوونیں‘ پئے جھلن چماٹے نٹ
اکھیں ساہویں اجن کھلوتڑن‘ شاہ پوری مٹھیائی دے ہٹ
جدوں پڑ وچ وڑناں گبھرواں‘ نہ خلق تے پونی تک
نئیں انج دا گبھرو ویکھیا‘ مارے کندو وانگ دھرک
گوٹھاں بہنیاں مار لوچڑاں‘ ادوں ناتو‘ تے اقبال
ہس ہس کے وکھیاں دوہریاں‘ ہو ونجنیاں وگتی نال
تینوں کی آکھاں میں ویلیا‘ ساڈے ترٹ گئے مان تران
کرے کٹھیاں سنگتاں وچھڑیاں‘ لبھاں چوہدری احمد خان
لبھاں کتھوں رُت رنگیلڑی‘ جدوں انج ناہ کملا بُت
بھئیں پون ہا مونہہ تے رونقاں‘ بھئیں پوے ہا سگویں رت
سانوں مار مکایائے اودراں‘ گئیاں سنگتاں چھوڑ جہان
گئیاں وچھڑ لطیف سہیلیاں‘ میں لُگا ہیٹھ اسمان