عورتاں نوں بوہت مشکلاں دا ساہمنا کرنا پیندا اے’سائرہ نسیم

لہور( پنجابی میڈیا گروپ) نامور گلوکارہ سائرہ نسیم نے آکھیا اے کہ ساڈھے معاشرے وچ اج دے دور وچ وی عورتاں لئی زندگی گزارنا انتہائی مشکل اے، مرداں دے معاشرے وچ نام تے مقام بنانا کوئی آسان کم نہیں لیکن بوہت ساریاں عورتاں ایس وچ کامیاب رہیاں نیں ۔ اک انٹر ویو وچ سائرہ نسیم نے آکھیا کہ شوبز سنے ہر شعبے وچ اج وی عورتاں نوں بوہت سارہیاں مشکلاں دا ساہمنا کرنا پیندا اے لیکن ایس دے باوجود اوہ ہمت نہیں ہاردیاں تے اگے ودھن دی جستجو وچ رہندیاں نیں تے کامیاب وی ہندیاں نیں ۔ اوہناں نے آکھیا کہ عورتاں اپنے آپ نوں مضبوط کرن خاص طو ر اُتے تعلیم دے زیور نال آراستہ ہون جس نال اوہناں دے اندر اعتماد آئے گا ۔ مرداں دے معاشرے وچ ناں تے مقام بنان لئی ساہنوں ہر ہنر آنا چاہیدا جس لئی ہر ویلے تگ و دو کرن دی ضرورت اے ۔ سائرہ نسیم نے آکھیا کہ فلم انڈسٹری دی ترقی دے آثار نمایاں ہون گے تے میوزک انڈسٹری دی ترقی ہو ئے گی کیونکہ ایس دی ترقی فلم انڈسٹری دی ترقی نال جُڑی ہوئی اے ۔