پی ایم ڈی سی تحلیل کرن دا صدارتی آرڈیننس کالعدم قرار، سارے ملازمین بحال

اسلام آباد: اسلام آباد ہائی کورٹ نے پی ایم ڈی سی تحلیل کرن دا صدارتی آرڈیننس کالعدم قرار دیندیاں سارے ملازمین نوں بحال کر دتا۔ عدالت نے اپنے فیصلے وچ قرار دتا کہ پاکستان میڈیکل کمیشن غیر قنونی اے۔

اسلام آباد ہائی کورٹ دے جسٹس محسن اختر کیانی نے 8جنوری دا محفوظ فیصلہ سنایا۔ فیصلے وچ آکھیا گیا اے پاکستان میڈیکل کمیشن دے قیام دا فیصلہ غیر قنونی اے، کیس دا تفصیلی فیصلہ بعد وچ جاری کیتا جاوے گا۔

فیصلہ سن دیاں ای پی ایم ڈی سی ملازمین نے خوشی دا اظہار کردیاں اک دوجے نوں مبارکباد دتی تے فیصلہ حق دی فتح قرار دتا۔

واضح رہوے صدر مملکت عارف علوی نے پچھلے ورھے 20اکتوبر نوں پاکستان میڈیکل کمیشن آرڈیننس نافذ کردیاں پاکستان میڈیکل اینڈ ڈینٹل کونسل نوں تحلیل کر دتا سی۔ پی ایم ڈی سی دے رجسٹرار بریگیڈیئر (ر) ڈاکٹر حفیظ الدین سنے ملازمین نے فیصلہ اسلام آباد ہائی کورٹ وچ چیلنج کیتا۔