مریم دی نوازشریف دی میڈیکل رپورٹ نوں ریکارڈ دا حصہ بنان دی عرضی، نیب نوں نوٹس

لہور: لہور ہائی کورٹ نے نوازشریف دی میڈیکل رپورٹاں نوں ریکارڈ دا حصہ بنان لئی مریم نواز دی عرضی تے نیب نوں نوٹس جاری کردیاں 25فروری نوں مرکزی کیس وی سماعت لئی مقرر کرن دا حکم دے دتا۔ مریم نواز دی نوازشریف دی تازہ میدیکل رپورٹاں نوں ریکارڈ دا حصہ بنان دی عرضی تے جسٹس علی باقر نجفی تے جسٹس طارق سلیم شیخ تے مشتمل بنچ نے سنوائی کیتی۔

مریم نواز نے عرضی وچ وزارت داخلہ، چیئرمین نیب سنے دوجیاں نوں فریق بنایا۔ درخواست گزار دے وکیل امجد پرویز نے موقف اختیار کیتا نوازشریف دی تازہ ترین میڈیکل رپورٹاں نوں ریکارڈ دا حصہ بنان دی اجازت دتی جاوے، آرٹیکل 15بنیادی حقوق دی فراہمی دی گل کردا اے۔ نیب پراسیکیوٹر نے دسیا مریم نواز سزا یافتہ نیں، ایس لئی اوہناں نوں بیرون ملک جان توں روکیا گیا۔ لیگی رہنما دے وکیل نے دسیا مریم نواز نوں سزا یافتہ ہون دی وجہ توں نہیں روکیا گیا، مریم نواز دا احتساب عدالت لہور وچ کیس زیر سماعت اے، اوہناں نوں 4یاں 6ہفتیاں لئی اک واری بیرون ملک جان دی اجازت دتی جاوے۔

عدالت نے مریم نواز دی عرضی تے نیب نوں نوٹس جاری کر دتا۔ مریم نواز نے ہائی کورٹ توں ای سی ایل توں ناں کڈھن تے پاسپورٹ دی واپسی لئی دائر درخواست وچ نوازشریف دی میڈیکل رپورٹاں نوں ریکارڈ دا حصہ بنان دی استدعا کر رکھی اے۔