پی ٹی آئی دالہور جلسہ اک ریفرنڈم ہوئے گا،عمران خان

لہور(پنجابی میڈیاگروپ)پاکستان تحریک انصاف دے چیئرمین عمران خان نے22مارچ نوں مینار پاکستان اُتے جلسہ کرن دا اعلان کردیاں ہویاں آکھیا اے کہ ایہ اجتماع اک ریفرنڈم ہوئے گا، اگر میں اسلام آباد توں نہ نکلدا اوتھے سیدھا سیدھا خون سی،تے سب دے ہتھ توں سب کجھ نکل جانا سی،اوتھے قتل عام ہونا سی تے ایہ آگ سارے ملک وچ پھیل جانی سی ، ایس ویلے ایہ حالات نیں اگر ہوش دے ناخن نہ لئے تے سب دے ہتھ توں نکل جائے گا ، مینوں ایہ نظر آیا اے اگر اسلام آباد وچ کجھ ہوجاندا تے ایہ گل اگے چلی جانا سی تے کسی توں کنٹرول نہیں ہونا سی، مجسٹریٹ صاحب نوں وی عقل آ گئی اے تے اوہناں نے گاڑ وچ حاضری لگوا لئی ،ہُن ویلا آ گیا اے اسیں اک اک پلس افسر دے خلاف کیس کر رہے نیں،جس طرح میرے گھر اُتے ہلہ بولیا گیا لہور ہائیکورٹ وچ توہین عدالت دا کیس کر رہے نیں ، ظل شاہ دے قتل دا محسن نقوی اُتے کیس ہوئے گا آئی جی اُتے وی کیس ہوئے گا ، سب اُتے کیس کراں گے،تُسی کہہ رہے او کہ عمران خان نوں جیل وچ سُٹاں گے ایہ رک جائے گا، قتل دا پلان بنیا ہویا اے اوس دے بعد سوچیا اے کیہ ہوئے گا، لندن وچ بیٹھیا شخص کہہ رہیا اے کہ بینظیر بھٹو شہید ہوئی سی تے حالات ٹھیک ہون وچ 15 دن لگے سن ، ایہ نہیں رہے گا تے اک مہینہ لگ جائے گا۔ ویڈیو لنک ذریعے خطاب کردیاں ہویاں عمران خان نے آکھیا کہ آکھیا اے کہ میں گھر وچ تباہی کیتی گئی ،گھر نوںلٹیا گیا ، چیزاں توڑیان گئیاں، میرے گھر وچ جو کجھ ہویا ہفتے والے دن مینوں بڑا غصہ سی ، اگر وچ ہفتے والے دن تہاڈے نال مخاطب ہُندا تے شاید غصے وچ اوہ گلاں وی کر جانداجیہڑیاں نہیںکرنیاں چاہیدیاں سن ۔ اوہناںنے آکھیا کہ پاکستان دی قوم مینوں 50ورھیاں توں جاندی اے ،میری زندگی پبلک اے ،کسی توں لُکی چھپی ہوئی نہیں اے جو میں ساں قوم جاندی اے ، کمزوریاں وی سن، اللہ نے عزت وی دتی ،کوئی چیز قوم توں لُکی چھپی نہیں رہی ، میں اوہ پاکستانی ہاں جداں قوم نے کَدی پاکستان دا قنون توڑدیاں نہیں ویکھیا ، عمران خان دا نام میچ فکسنگ وچ نہیں آیا ، میری مہم پاروں انٹر نیشنل کرکٹ وچ غیر جانبدار امپائر آئے ،اگر انٹر نیشنل کرکٹ وچ غیر جانبدار امپائرنیں تے اوہ عمران خان پاروں نیں۔