صوبائی الیکشن ملک وچ فساد پیدا کرن گے: رانا ثنا اللہ

فیصل آباد(پنجابی میڈیاگروپ)وفاقی وزیر داخلہ رانا ثنا اللہ نے آکھیا اے کہ دوناں صوبیاں وچ الیکشن ملک وچ فساد پیدا کرن گے، اوہناں نے صوبائی اسمبلیاں فساد پھیلان لئی توڑیاں سن، ایہ الیکشن اک نویں بحران نوں جنم دیاں گے، زمان پارک توں100دے نیڑے مسلح لوکاں نوں گرفتار کیتا گیا۔فیصل آباد وچ پریس کانفرنس کردیاں ہویاں مسلم لیگ (ن) پنجاب دے صدررانا ثنا اللہ نے آکھیا کہ اک شخص پوری قوم دے ساہمنے جھوٹ بول رہیا اے، عمران خان نے اج نازیبا الفاظ استعمال کیتے، عمران خان نے اج مریم نواز دے خلاف گھٹیا زبان استعمال کیتی، ثابت ہو گیا مریم نواز ایس نوں بے نقاب کرن وچ کامیاب رہی، عمران خان نوں خطرہ اے کہ مریم ایس نوں بے نقاب کر دیوے گی ۔ رانا ثنا اللہ نے آکھیا کہ عمران خان نے سیاسی مخالفاں اُتے الزام تراشی دے سوا کجھ نہیں کیتا ، مریم نواز نے عمران خان دی فتنہ فساد دی سیاست نوں بے نقاب کیتا، عمران خان نے گالم گلوچ تے بدتہذیبی دے کلچر نوں فروغ دتا،اوہ لوکاں نوں بیوقوف بنانا چھڈ دین، فتنہ خان دے مکر و فریب نوں قوم سامنے رکھنا ضروری اے، عمران خان جتھیاں دے ہمراہ جوڈیشل کمپلیکس اُتے حملہ آور ہوئے۔وزیر داخلہ نے ہور آکھیا کہ عمران خان غنڈہ گردی تے دنگا فساد کر رہے نیں، اوہناں نے فرح گوگی ذریعے کرپشن کیتی، اگر سڑک اُتے حاضری لگنی اے تے گھر توں ہی حاضری لگوا دیندے، عمران خان اُتے توشہ خانہ دی چوری ثابت ہو چکی اے، مسلح جتھاںدے نال عدالت جانا غنڈا گردی اے، ایس شخص نوںلُٹ مار دا حساب دینا ہوئے گا، ایہ جتھاںنوں لے جا کے عدالتاں اُتے پریشر پانا چاہندے نیں ۔مسلم لیگ (ن)پنجاب دے صدر رانا ثنا اللہ نے آکھیا کہ عمران خان نے ملکی خزانے نوں50ارب دا ٹیکہ لایا، اوہناں نے القادر ٹرسٹ دے نام اُتے7ارب روپے دی زمین لئی، جَد ایہ 4ورھے جھوٹے مقدمے بنا رہے سن تَد غیرت نہیں آئی؟، مریم نواز دے نال جیل وچ بدترین سلوک کیتا گیا، ڈرامہ کر کے فتنہ فساد تے جرماں نوں چھپا نہیں سکدے، عمران خان نے کس قنون تحت زمان پارک وچ مسلح جتھے رکھے۔