اعجاز الحق ساتھیاں سنے تحریک انصاف وچ شامل

لہور( پنجابی میڈیاگروپ)مسلم لیگ (ضیا)دے سربراہ اعجاز الحق نے ساتھیاں سنے پی ٹی آئی وچ شامل ہو گئے ۔میڈیا دے مطابق مسلم لیگ (ض)دے سربراہ اعجاز الحق دی لہور زمان پارک وچ پی ٹی آئی دے چیئرمین عمران خان نال ملاقات ہوئی، جس وچ مستقبل دی سیاست بارے تبادلہ خیال کیتا گیا۔دوران ملاقات اعجاز الحق نے تحریک انصاف وچ ساتھیاں سنے شامل ہون دا اعلان کیتا۔ ذرائع دا کہنا اے کہ اعجاز الحق پی ٹی آئی دے ٹکٹ اُتے آئندہ الیکشن لڑاں گے،شامل ہون توں بعد صحافی نال غیر رسمی گل بات کردیاں اعجاز الحق نے آکھیا کہ عمران خان دے نال اسیں بوہت عرصے توں ہاں، اسیں مل کے الیکشن لڑاں گے تے ساڈی پارٹی جیہڑی شہید ضیا الحق دے نام اُتے اے اوہ زندہ رہے گی جدکہ میں عمران خان دے نال ہاں۔موجود صورت حال بارے سوال اُتے اعجاز الحق نے آکھیا کہ جنہی چھیتی ممکن ہوئے ملک نوں مشکلاں تے مسائل توں کَڈنا چاہیدا اے تے ہر قسم دی گل بات لئی آپس وچ اک نال بیٹھنا چاہیدا اے تے اگر ایہ خود نہیں بیٹھ سکدے تے کوئی اوہناں نوں نال بیٹھا سکدا اے۔اوہناں نے انکشاف کیتا کہ عمران خان نے بولیا کہ اسیں ہر کسی نال گل بات کرن لئی تیار ہاں مگر اجے الیکشن بارے گل کرن کیونکہ اجے تے کسی چیز اُتے گل بات نہیں ہوسکدی۔ اعجاز الحق نے آکھیا کہ لوکاں دے گھر اُتے جانا، شیلنگ کرن دے واقعات پاکستان وچ پہلی وار ویکھ رہیا ہاں، اینج نہ ہوئے کہ ترازو دے پلڑے برابر کرواندیاں کرواندیاں ترازو ہی ٹٹ جائے۔