آرمی چیف دے خلاف مہم اداریاں دے خلاف سازش اے:وزیراعظم

اسلام آباد (پنجابی میڈیاگروپ)وزیراعظم شہباز شریف نے فوج تے اوس دے سپہ سالار جنرل عاصم منیر دے خلاف باہر دے ملک چلن والی غلیظ مہم دی شدید مذمت کیتی اے ۔سماجی رابطے دی ویب سائٹ ٹوئٹراُتے مرحلہ وار ٹوئٹس وچ وزیراعظم شہبازشریف نے آکھیا کہ آرمی چیف دے خلاف مہم ناقابل برداشت تے اداریاں دے خلاف سازش دا تسلسل اے ، باہر دے ملک محب وطن پاکستانی فارن فنڈڈ مہم دے خلاف آواز اُچی کرن ۔وزیر اعظم نے آکھیاکہ زہریلی سیاست نوں باہر دے ملک پاکستانیاںذریعے پھیلا رہے نیں، باہر دے ملک پاکستانی ایس سازش دا حصہ نہ بنن ، عمران خان اداریاں تے اوہناں دے سربراہواں نوں اپنی گندی سیاست وچ گھسیٹ کے آئین شکنی کر رہے نیں ۔اوہناں نے آکھیا کہ پاکستان وچ افراتفری ، فساد تے بغاوت نوں ہوا دین والیاں دے خلاف سخت قنونی کارروائی کیتی جائے ، وزیراعظم نے وزیر داخلہ نوں ہدایت کیتی کہ ملک اندر اداریاں دے خلاف غلیظ مہم چلان والیاں نوں آہنی ہتھاں نال نمٹن ۔ وزیر اعظم شہباز شریف نے ہور آکھیا کہ تریخ وچ پہلی وار میرٹ اُتے لگن والے آرمی چیف دے خلاف مہم ملک دشمناں داایجنڈا ہی ہو سکدا اے ، قوم اپنے اداریاںدے نال کھڑی اے تے شرپسنداں دے خلاف متحد اے