الیکشن:8اکتوبرنوں سب ٹھیک ہو جائے گا،8ستمبر یا8اگست کیوں نہیں؟چیف جسٹس

اسلام آباد(پنجابی میڈیاگروپ)سپریم کورٹ وچ پنجاب تے خیبرپختونخوا دے الیکشن ملتوی کرن دے خلاف پی ٹی آئی تے ہوراںدیاں درخواستاں اُتے سماعت ہوئی، فریقاں ولوں تفصیلی دلائل دتے گئے، عدالت نے کیس دی ہور سماعت کل تک ملتوی کر دتی ۔ چیف جسٹس آف پاکستان دی سربراہی وچ جسٹس اعجاز الاحسن، جسٹس منیب اختر ،جسٹس امین الدین خان تے جسٹس جمال خان مندوخیل اُتے مشتمل5رکنی لارجر بنچ سماعت کررہیا اے ۔ مسلم لیگ ن ، پیپلز پارٹی تے جے یوآئی ف نے کیس وچ پارٹی بنن دی متفرق درخواست دائر کردتی ، پیپلز پارٹی دے وکیل فاروق ایچ نائیک نے آکھیا کہ جسٹس جمال دے ریمارکس دے بعد فل کورٹ بنائی جائے۔جسٹس جمال نے آکھیا کہ فل کورٹ کیوں ؟ اوہی7جج بنچ وچ بیٹھنے چاہیدے نیں ، فاروق ایچ نائیک نے آکھیا کہ پہلاں فیصلہ کرن کہ4/ 3 دا یا3/2 دا فیصلہ سی، ساری قوم ابہام وچ اے۔دوران سماعت جسٹس جمال مندوخیل نے اپنے ریمارکس وچ آکھیا کہ میں وضاحت کرنا چاہندا ہاں کہ سپریم کورٹ دے انتظامی مسائل نوں اندرونی معاملہ آکھیا سی، میں اپنے اختلافی نوٹ اُتے قائم ہاں، الیکشن کیس اُتے ازخود نوٹس اُتے سپریم کورٹ دا فیصلہ 4،3 نال اے، سپریم کورٹ دے اکثریتی فیصلے نے ازخود نوٹس نوں مسترد کیتا سی ۔ جسٹس جمال مندوخیل نے استفسار کیتا کہ صدر نے الیکشن دی تریخ دا اعلان کِنج کر دتا ، الیکشن کمیشن نے الیکشن لئی کِس نال مشاورت کیتی، سپریم کورٹ دے اکثریتی ججاں مطابق الیکشن دا حکم نہیں دتا گیا ، سریم کورٹ دا آرڈر آف دا کورٹ 4 ججاںدا فیصلہ اے۔الیکشن کمیشن دے وکیل عرفان قادر نے دوران سماعت آکھیا کہ میری اج پہلی پیشی اے، اک پروسیجر اے، عدالت نوں چھیتی کیہ اے؟ چیف جسٹس پاکستان نے ہدایت کیتی کہ اگر دستاویزات نہیں تے تُسی اپنے کیس اُتے دلائل دیو، تُسی دُوجے وکیل نوں سپر سیڈ کر رہے او۔الیکشن کمیشن دے وکیل عرفان قادر نے آکھیا کہ عدالت دی مرضی اے، جو تُسی کرنا چاہو، عدالت جس وکیل نوں لینا چاہندی اے لے لئے، میں روسٹرم چھڈا ہاں، جاننا چاہندا ہاں کہ عدالت مینوں بطور وکیل الیکشن کمیشن سننا چاہندی اے یا نہیں؟ بینچ کہہ دیوے کہ میں الیکشن کمیشن دی نمائندگی نہ کراں تے چلا جاواں گا ۔ چیف جسٹس نے آکھیا کہ الیکشن کمیشن ولوں کل حامد علی شاہ تے سجیل سواتی آئے سن ، عرفان قادر ٹھیک اے میں چلا جاندا ہاں کہہ کے کمرہ عدالت توں چلے گئے، جس اُتے الیکشن کمیشن دے وکیل سجیل سواتی روسٹرم اُتے آ گئے۔الیکشن کمیشن دے وکیل سجیل سواتی نے جواب دتا کہ الیکشن کمیشن نے یکم مارچ دے فیصلے اُتے عمل کیتا، عدالتی حکم دے بعد الیکشن کمیشن نے صدر نال رجوع کیتا ، صدر مملکت نے 30اپریل دی تریخ دتی، کمیشن نے تریخ مقرر کرن دے بعد شیڈول جاری کیتا تے الیکشن دیاں تیاریاں شروع کردتیاں، آرٹیکل 224 تحت الیکشن 90 دناں وچ ہونے نیں، عدالتی آرڈر وچ لکھیا اے کہ فیصلہ 3/2 نال اے، 3/2 والے فیصلے اُتے 5 ججاں دے دستخط نیں، کمیشن نے فیصلے دے پیراگراف 14 تے شروع دیاں سطراں نوں پڑھ کے عمل کیتا، ممکن اے کہ ساڈے سمجھن وچ غلطی ہوئی ہوئے ۔ جسٹس منیب اختر نے آکھیا کہ الیکشن کمیشن نے قنونی رائے لیتیوں بغیر 3 ججaں دے اکثریتی فیصلے اُتے عمل کیتا اگر جمال خان مندوخیل ریمارکس نہ دیندے تے میں ایہ گل نہ کردا،کیا اقلیت خود ساختہ طور اُتے ایہ دعوی کر سکدی اے کہ اوہ اکثریت وچ اے، جس اُتے جسٹس جمال خان مندو خیل نے آکھیا کہ جیہڑے ریمارکس وچ سوال کیتا اے اوس دا جواب الیکشن کمیشن دیوے۔ جسٹس منیب اختر نے ریمارکس وچ آکھیا کہ 5جج عدالت وچ بیٹھے سن کر فیصلہ کرن تے 2 آکھن کہ ساڈا فیصلہ اکثریتی فیصلہ اے ،ساڈے چیمبرز وچ جو کجھ ہویا ایتھے اوہ زیربحث نہیں آنا چاہیدا، دوناں ججاںدا احترام اے مگر اقلیتی فیصلہ اکثریتی فیصلے اُتے غالب نہیں آسکدا، قنون واضح اے کہ اقلیتی فیصلے دی کوئی اہمیت نہیں ہُندی، جسٹس منصور تے جسٹس جمال خان دا فیصلہ اقلیتی اے ۔جسٹس جمال مندوخیل نے آکھیا کہ ساڈے تفصیلی فیصلے بعد الیکشن کمیشن داکیہ موقف اے، جس اُتے وکیل نے آکھیا کہ اجے مینوں اوس اُتے نویں ہدایت نہیں ملی۔