افتخار چودھری نے عدالتی آمریت قائم کیتی، بلاول

اسلام آباد(پنجابی میڈیاگروپ)پاکستان پیپلز پارٹی دے چیئرمین تے وزیر خارجہ بلاول بھٹو نے آکھیا اے کہ ساڈے اتحادی اک ہور چیف جسٹس افتخار چودھری نوں بھُل جاندے نیں، افتخار چودھری نے ایس ملک اُتے عدالتی آمریت قائم کیی جس دا مقصد جمہوریت نوں نقصان پہنچانا تے ہائبرڈ نظام قائم کرنا سی ۔ قومی اسمبلی وچ اظہار خیال کردیاں ہویاں وزیر خارجہ بلاول بھٹو نے آکھیاکہ پاکستان نوں ایس ویلے بوہت مسائل دا سامنا اے، پاکستان دی عوام تریخی معاشی بحران دا مقابلہ کر رہے نیں، اک نالائق وزیراعظم ساڈے اُتے مسلط کیتا گیا سی ، اوس نے اپنے ہتھاں نال پاکستان نوں بحران ول دھکیلا، کجھ روس تے یوکرین جنگ دے وی اثرات نیں،اوہناں نے آکھیاکہ اسیںاک ایسی قدرتی آفت ویکھی جیہڑی تریخی سی، اک تہائی پاکستان دی سرزمین پانی وچ ڈوبی ہوئی سی، اج وی سندھ، بلوچستان دی عوام قدرتی آفت نال پیدا ہون والے مسائل دا مقابلہ کر رہے نیں ۔ بلاول بھٹو نے آکھیا کہ ایس حکومت دے ہر قدم دے خلاف آوازاں اُٹھیاں نیں، ساریاں قوتاں اک پیج اُتے نیں تے مقصد ایہ اے کہ سلیکٹڈ نوں واپس کرسی اُتے بٹھانا اے،ساہنوں نہیں پتا کہ اگے جاکے کیہ ہوئے گا لیکن جس قنون سازی اُتے اج کم ہو رہیا اے اوہ اگے جا کے تریخ دا حصہ بنے گا۔وزیر خارجہ دا کہنا سی جمہوری عدم اعتماددے جواب وچ سپیکر تے صدر نے آئین توڑیا، وزیراعظم صاحب اگر آئین توڑیا گیا اے تے کیس قائم کرنا چاہیدا اے، ثاقب نثار دی قیادت وچ سپریم کورٹ نے آئین توڑیا ، چیف جسٹس کول ایہ کیہڑااختیار اے کہ ڈیم فنڈ جمع کرے، ایہ فرعون ونگوںبیٹھ کے آئین دی مرضی دی تشریح کردے نیں، ایہ فیصلے لکھدے نیں تے آئین توڑدے نیں۔