کراچی:راشن تقسیم کرن ویلے 3بالاں سنے12افراد جاں بحق

کراچی(پنجابی میڈیاگروپ)سائٹ ایریا نورس چورنگی دے نیڑے نجی کمپنی وچ راشن دی تقسیم دے دوران بھگدڑمچن نال3بالاں سنے12 افراد جاں بحق ہوگئے۔ ابتدائی تفصیل دے مطابق بھگدڑ مچن نال نالے وچ ڈِگن نال عورتاں وی جاں بحق ہوئیاں جدکہ کئی افراد زخمی ہون دی اطلاع اے ۔جاں بحق تے زخمی ہون والے افرادنوں عباسی اسپتال منتقل کیتا جارہیا اے۔ایدھی فانڈیشن دے رضا کار دے مطابق راشن دی تقسیم ویلے بجلی دی تارڈِگن پاروں بھگدڑ مچی۔عینی شاہدین مطابق بھگدڑ مچن نال کئی افراد بے ہوش وی ہوگئے۔پلس ولوں جاری اعداد و شمار دے مطابق حادثے وچ12افراد جاں بحق جدکہ 5زخمی ہوئے جنہاں وچوں 3 دی حالت تشویشناک اے، مرن والیاں تے زخمیاں وچ عورتاں تے بال وی شامل نین۔ایس پی بلدیہ ٹائون دے مطابق کمپنی ولوں راشن تقسیم دی اطلاع نہیں دتی گئی سی، بھگدڑ دے دوران پانی دی لائن لیک ہوئی، جس وچ بجلی دا تارڈِگیا تے ایہی ہلاکتاںدی وجہ بنیا۔ پلس نے کمپنی توں7افراد نوں حراست وچ لئے کے تھانے منتقل کردتا۔ڈی سی کیماڑی مختیار علی ابڑو نے جائے وقوعہ اُتے میڈیا نال گل کردیاں ہویاں آکھیا کہ ایس طرح دے افسوسناک واقعات پہلاں وی پیش آ چکے نیں، ایتھے ڈائنگ فیکٹری انتظامیہ مستحقین وچ راشن تے نقدی تقسیم کررہی سی، ایس طرح دا پروگرام منعقد کرن توں پہلاں پلس تے ضلعی انتظامیہ نوں آگاہ کرنا تے اجازت لینا ضروری ہُندا اے۔اوہناں نے آکھیا کہ فیکٹری انتظامیہ نے کوئی اطلاع نہیں دتی سی، ایہ خلاف قنون عمل اے، فیکٹری مالک عمرے دی ادائیگی اُتے گئیا ہویا اے، واپس آن اُتے شامل تفتیش کرن گے جدکہ فیکٹری توں ملازماں سنے7افراد گرفتار کرلئیا اے۔وزیراعلی سندھ سید مراد علی شاہ نے سیمنز چورنگی اُتے پیش آن والے افسوسناک واقعے دانوٹس لیندیاں ہویاں کمشنر کراچی توں رپورٹ منگ لئی۔