الیکشن التوا کیس:سماعت پیر تک ملتوی

اسلام آباد(پنجابی میڈیاگروپ)پنجاب تے خیبر پختونخوا اسمبلیاں دے الیکشن ملتوی کرن دے خلاف کیس دی سماعت دے دوران سپریم کورٹ نے اٹارنی جنرل ولوں فل کورٹ بنان دی استدعا مسترد کردیاں ہویاں کیس دی سماعت پیر ساڑھے11وجے تک ملتوی کردتی ۔ جسٹس جمال مندوخیل دی معذرت دے بعد بنچ اک وارفیر ٹُٹ گیا اے، پچھلے دناں وی5رکنی بنچ وچ شامل جسٹس امین الدین بنچ توں وَکھ ہوگئے سن جس دے بعد اج باقی ججاں اُتے مشتمل بنچ نے کیس دی سماعت کرنا سی۔اج چیف جسٹس پاکستان دی سربراہی وچ4 رکنی بنچ سماعت لئی کمرہ عدالت پہنچیا، بنچ وچ جسٹس اعجازالاحسن، جسٹس منیب اختر تے جسٹس جمال مندوخیل شامل سن ۔ اٹارنی جنرل منصور عثمان اعوان روسٹرم اُتے آئے تے چیف جسٹس نے آکھیا کہ اٹارنی جنرل صاحب، تہانوں پہلاں جسٹس جمال مندوخیل کجھ آکھناچاہندے نیں ۔ ایس موقع اُتے جسٹس جمال مندوخیل نے کیس سنن توں معذرت کرلئی، اوہناں دا کہنا سی کہ جسٹس امین الدین نے کیس سنن توں معذرت کیتی، جسٹس امین الدین دے فیصلے دے بعد حکم نامے دا انتظار سی، مینوں عدالتی حکم نامہ کل گھر موصول ہویا، حکم نامے اُتے میں وَکھ توں نوٹ تحریرکیتا اے،اٹارنی جنرل صاحب تُسی اختلافی نوٹ پڑھ کے سناو۔