سٹیٹ بینک نے رقم نہ دتی تے سمجھو پاکستان وچ آئین ختم ہو چکیا اے: عمران خان

لہور( پنجابی میڈیاگروپ)چیئرمین پاکستان تحریک انصاف عمران خان نے آکھیا اے کہ سٹیٹ بینک نے سپریم کورٹ دے کہن اُتے رقم نہ دتی تے ایس دا مطلب اے کہ پاکستان وچ آئین و قنون دی حکمرانی ختم ہو چکی اے کمرہ عدالت وچ صحافیاں توںغیر رسمی گل بات کردیاں ہویاں سابق وزیر اعظم عمران خان نے آکھیا کہ اسیں مذاکرات کر رہے ہاں جدکہ آئین مطابق مذاکرات دی لوڑ نہیں اے،90دناں توں بعد الیکشن نہیں ہو سکدے، ایس دے بعد آئین ختم ہو جاندا اے ایس اُتے ساری لیگل کمیونٹی متفق اے، 90 دناں بعد نگران حکومت دی کوئی آئینی حیثیت نہیں رہے گی، 90دناں بعد جو کجھ کراں گے اوہ غیر آئینی ہوئے گا۔چیئرمین پی ٹی آئی عمران خان نے آکھیا کہ نگران حکومت نوں ہٹا کے اک ایڈمنسٹر لانا چاہیدا اے جس دا کم صرف الیکشن کروانا ہوئے، ایہ نگران حکومت کسی ہور ایجنڈے اُتے آئی ہوئی اے، نگران حکومت سب کجھ کر رہی اے ماسوائے الیکشن کروان دے، ایہ نگران حکومت اوہ انتقامی کارروائی کر رہی اے جیہڑی کدی منتخب حکومتاں نے نہیں کیتی، ایہ لندن پلان دا حصہ اے جیتھے نواز شریف نال وعدہ کیتا گیا سی۔عمران خان نے آکھیا اے کہ ایہ تحریک انصاف نوں دیوار نال لان تے نواز شریف دے کیس ختم کرن دے ایجنڈے اُتے چل رہے نیں، کون کہندا اے کہ امریکا، سعودی عرب نال ساڈے تعلقات خراب سن، ایہ جنرل باجوہ نے ساڈے خلاف کمپین چلائی، اوہ ایکسٹینشن چاہندے سن، 3مہینیاں وچ2 او آئی سی دی میٹنگ پاکستان وچ ہوئیاں ایہ کَدی پاکستان وچ ہویا، دسن اینج کدی پاکستان وچ کنی دیر پہلاں ہویا سی۔سابق وزیر اعظم عمران خان نے ہور آکھیا اے کہ چائنہ، سعودیہ، ترکیہ، ٹرمپ تے بورس جونسن دے نال ساڈے خوشگوار تعلقات سن، اوہناں نوں کون پچھدا اے ایہ کہندے نیں ساڈے تعلقات نیں، پاکستان وچ پہلاں ہی انسانی بنیادی حقوق دی بری طرح پامالی کیتی جا رہی اے، لوکاں نوں پہلاں اغوا جدکہ اوس دے بعد چارج لائے جاندے نیں، جدھر ویکھو پی ٹی آئی دا آدمی اے، ساڈا میڈیا اُتے بلیک آٹ کیتا ہویا اے۔