ڈیم لئی جمع رقم محفوظ ہتھاں وچ اے،ثاقب نثار

لہور( پنجابی میڈیاگروپ) سابق چیف جسٹس پاکستان میاں ثاقب نثار نے آکھیا اے کہ لوکاں نے ڈیم لئی جیہڑی رقم دتی اے اوہ محفوظ ہتھاں وچ اے، جس سپیڈ نال اسیں ڈیم دی تعمیر کرانا چاہندے ساں اوس وچ جیپہڑیاںرکاوٹاں آئیں تے دا ذکر نہیں کرنا چاہندا۔میاں ثاقب نثار نے علی پارک وچ جامعہ غوثیہ وچ تقریب نال خطاب کردیاں ہویاں آکھیا کہ گناہواں توں بچنا تے عبادت کرنا اہم اے، قرآن نوں پڑھنا ہی نہیں سمجھنا تے عمل کرنا اہم اے، زندگی گزارن دے اسلوب قرآن ذریعے اللہ نے ساہنوں دَس دتے، اک زندگی نال ہی گھر تے معاشرہ وجود وچ آندا اے۔اوہناں نے آکھیا کہ معاشرے وچ سب توں اہم گل تربیت تے دیانت اے۔ ساہنوں اپنے معاملات وچ دیانت تے خدمت دا شعار اپنانا ہوئے گا، معاملات وچ دیانت ہی ساڈے دین دی اساس اے، بال ساڈا مستقبل نیں، میرا سیاسی مقصد نہیں اے، پاکستان دے حالات چنگے نہیں ، ایس دی وجہ ایہ اے کہ ساڈے معاملات درست نہیں نیں ۔ ساڈے بالاں نے ملک دی تعلیم تے تربیت سنبھالنی اے، اج اسیں ملک دی بقا لئی جنگ لڑ رہے ہاں، ایہ جنگ ایس لئی لڑنی پہ رہی اے کہ اسیں دین دے اسلوب توں ہٹ گئے ہں، زندگی دے معاملات دی پچھ ضرور ہوئے گی، بالاں دی تعلیم وتربیت کیتی اے یا نہیں اوس دی باز پرس ضرور ہوگی۔اوہناںنے آکھیا کہ جَد اسیں لوگ اپنے اندر جھانک کے ویکھیاں گے تے ساہنوں اپنیاں خامیاں تے کوتاہیاں وکھائی دیون گیاں، ساہنوں اپنے اندروں منافقت ختم کرنا ہوئے گی، اپنی اناں نوں ختم کرنا ہوئے گا، لوکاں نے ڈیم دی رقم جیہڑی دتی اے اوہ محفوظ ہتھاں وچ اے، ڈیم دی رقم 10 ارب جمع ہوئی سی ایس رقم دی حفاظت لئی پنچ رکنی بینچ تشکیل دتا سی، ایس رقم نوں بینچ نے انویسٹ کردتا سی جیہڑاودھ کے 17 ارب روہے ہوگئی اے۔