کورونا وائرس دے خطرات، جماعت اسلامی نے مہنگائی دے خلاف احتجاجی مہم معطل کر دتی

لہور: امیر جماعت اسلامی سراج الحق آکھیا اے وزیراعظم دی تقریر وچ مایوسی سی۔ اسیں ملک بھر وچ کورونا آگاہی مہم چلاواں گے۔

اوہناں نے حکومت نوں جماعت اسلامی تے الخدمت فاؤنڈیشن دے سارے ہسپتال عوامی خدمت لئی استعمال کرن دی پیشکش کردتی۔

سراج الحق دا پریس کانفرنس کردیاں کہنا سی جماعت اسلامی ملک وچ ودھدی ہوئی مہنگائی دے خلاف مہم چلا رہے نیں۔ مہنگائی ، بیروزگاری، شرح سود، پٹرول تے گیس دی قیمتاں وچ وادھا ہویا اے۔

ایہدے علاوہ مافیا نے آٹا تے چینی دی قیمتاں وچ وی ایناں وادھا کیتا کہ راتوں رات ارباں روپے کما لئے۔

اوہناں دا کہنا سی جماعت اسلامی نے عام بندے لئی جدوجہد شروع کیتی۔ اسیں کراچی توں پشاور تک مہنگائی تے بیروزگاری دے خلاف مہم چلائی سی پر کورونا دی وجہ توں ایہنوں ملتوی کر دتا گیا اے۔

امیر جماعت اسلامی آکھیا سب لوک ایس وائرس دی زد وچ نیں۔

وڈے ملکاں نے اپنے آپ نوں قلعہ بند کر لیا اے۔ کورونا وائرس باہر توں درآمد ہویا پر حکومتی ناقص پالیسیاں توں پھیلیا اے۔