املاک، تنصیبات اُتے حملے: وسیع تر ملکی مفاد وچ صبرتوں کم لئیا:پاک فوج

پنڈی(پنجابی میڈیا گروپ)سابق وزیر اعظم عمران خان دی گرفتاری دے بعد ملک وچ ہون والے احتجاج دے دوران پُرتشدد واقعات اُتے پاک فوج ولوں ردعمل دیندیاں آ گیا۔پاک فوج دے شعبہ تعلقات عامہ ولوں بیان وچ آکھیا گیا کہ9مئی دا دن اک سیاہ باب ونگوں یاد رکھیا جائے گا، چیئرمین تحریک انصاف عمران خان نوں نیب دے اعلامیہ مطابق کل اسلام آباد ہائیکورٹ دے قنون مطابق حراست وچ لئیا گیا، گرفتاری دے فورا بعد اک منظم طریقے نال پاک فوج دی املاک تے تنصیبات اُتے حملے کرائے گئے تے فوج دے خلاف نعرے بازی کروائی گئی۔آئی ایس پی آر نے آکھیا کہ کسی نوں وی عوام نوں اُکسان تے قنون نوں ہتھ وچ لین دی اجازت نہیں دتی جا سکدی، شر پسند عناصر عوامی جذبات نوں اپنے خود غرض مقصد لئی استعمال کردے نیں، فوج بشمول سارے قنون نافذ کرن والے ادارے، فوجی و ریاستی تنصیبات تے املاک اُتے کسی وی حملے دی صورت وچ شدید ردعمل دتا جائے گا جس دی ذمہ داری اُسی ٹولے اُتے ہوئے گی جیہڑے پاکستان نوں خانہ جنگی وچ دھکیلنا چاہندااے۔پاک فوج ولوں بیان وچ ہورآکھیا گیا اے کہ جیہڑا کم ابدی دشمن 75 ورھیاں وچ نہ کر سکے اوہ اقتداردی حوس وچ مبتلا گروہ نے کر وکھایا اے ۔ فوج نے انتہائی تحمل تے بردباری دا مظاہرہ کیتاتے اپنی ساکھ دی پرواہ کیتیوں بغیر ملک دے وسیع تر مفادوچ صبر توں کم لئیا،مذموم منصوبہ بندی تحت گھنائونی کوشش کیتی گئی کہ آرمی اپنا فوری رد عمل دیوے، فوج دے میچور رسپانس نے سازش نوں نکام بنادتا۔