تحریک انصاف ہر اوہ کم کر رہی جس نال بھارت وچ شادیانے وجدے نیں:مریم اورنگزیب

اسلام آباد(پنجابی میڈیا گروپ)وفاقی وزیر اطلاعات مریم اورنگزیب نے آکھیا اے کہ تحریک انصاف دے مسلح جتھیاں دا ریڈیو پاکستان تے اے پی پی دے دفتر اُتے حملہ قابل مذمت تے افسوسناک اے۔اپنے بیان وچ وفاقی وزیر اطلاعات مریم اورنگزیب نے آکھیا اے کہ جس طرح پی ٹی وی، پارلیمنٹ اُتے حملہ کرایا سی اوسی طرح عمران خان دے کہن اُتے اج ریڈیو پاکستان تے اے پی پی دے دفتر اُتے حملہ کیتیا گئیا،عورتاں سنے سرکاری عملے اُتے تشدد، توڑ پھوڑ تے املاک نوں نقصان پہنچانا ات گردی اے، بھارت خوش ہو رہیا اے کہ کشمیراُتے خبراں چلان والے ریڈیو نوں عمران خان دے حامیاں اگ لا دتی۔ مریم اورنگزیب نے ہور آکھیا اے کہ ایہ ہر اوہ کم کر رہے نیں جس نال بھارت وچ شادیانے وجائے جاندے نیں، پی ٹی آئی دے مسلح جتھیاں نے چاغی یادگار تے ریڈیو آڈیٹوریم نوں اگ لائی جس نال اوہناں دی ذہنی حالت دا اندازہ کیتا جا سکدااے، جس طرح عمران خان نے ملک تے توشہ خانہ لُٹیا، ایسی طرح اوس دے حامی سرکاری عمارت دا سامان لُٹ کے لے گئے، سرکاری نشریات رکوان دی کوشش کیتی۔