شرپسنداں نال آہنی ہتھاں نال نمٹیاجائے گا:وزیراعظم

اسلام آباد(پنجابی میڈیا گروپ)وزیراعظم شہباز شریف نے قوم نال خطاب وچ آکھیا ملک دشمن عناصر نوں خبردارکیتا اے کہ اوہ اپنیاں سرگرمیاں توں بازآجان،دُوجی صورت وچ قنون ہتھ وچ لین والے شرپسنداں نال آہنی ہتھاں نال نمٹیاجائے گا،شرپسنداںنوں آئین و قنون مطابق قرار واقعی سزا ملے گی۔اپنے خطاب وچ شہباز شریف نے ہور آکھیا کہ میثاق جمہوریت سیاسی انتقام دفن کرن دی دستاویز اے ، جَد حکومت سنبھالی تے پچھلی حکومت ورگا بدنما تے ظالمانہ طرز عمل اختیار نہیں کیتا،عمران خان دے دور وچ کیس نہیں چہرہ ویکھیا جانداسی،عمران نیازی کہندے سن کہ کل اک ہور وکٹ ڈِگن والی اے تے اوہ وکٹ ڈِگ جاندی سی۔ وزیراعظم نے آکھیا کہ پچھلے دور وچ محض الزام اُتے ہی گرفتاری ہوجاندی سی،رانا ثنا اللہ اُتے15کلو ہیروئن دا کیس پائیا گیااوہ سیاہ دور سی، جَد نیب قنون وچ ترمیم دی گل کیتی تے طعنہ زنی کیتی جاندی سی ، پرانے نیب قنون دے تحت90دن لئی کیتا جاندا سی۔اوہناں نے آکھیا کہ اسین نیب قنون وچ ترمیم کرائی تے ریمانڈ 90 دن توں گھٹ کرکے15 دن کرائی، اج نیب قنون وچ ترمیم دا پہلا بینیفیشری عمران خان اے۔شہباز شریف نے آکھیا کہ ساڈے اُتے جیہڑے الزام لائے گئے سن اوہناں وچوں اک وی ثابت نہیں ہویا، شدید تحفظات دے باوجود وی اسیں قنون دا سامنا کیتا، نواز شریف بستر مرگ اُتے اپنے گھر والی نوں چھڈ کے جیل چلے گئے، بے نظیر بھٹو دی شہادت دے بعد پیپلزپارٹی نے جس اعلی طرز عمل دا مظاہرہ کیتا ہمیشہ احترام رہے گا، آصف زرداری نے پاکستان کھپے دا نعرہ لا کر دشمن دے عزائم خاک وچ ملادتے سن ،وزیراعظم نے آکھیا کہ املاک نوں نقصان پہنچانا ات گردانہ عمل تے ملک دشمنی اے ، عمران نیازی دی گرفتاری کرپشن دے مقدمے وچ ہوئی اے، القادر ٹرسٹ کیس دے ساریاں شواہد تے ثبوت موجود نیں، 190ملین پانڈ دے معاملے نوں لفافے وچ بند کرکے کابینہ توں منظور کرایا گیا، کابینہ نوں مکمل طور اُتے اندھیرے وچ رکھیا گیا، جَد لفافہ کھول کے ویکھیا ہی نہیں تے ایہ کابینہ دا فیصلہ کنج ہوسکدا اے؟اوہناں نے آکھیا کہ بطور سیاسی کارکن اسیں کسی دی گرفتاری اُتے خوشی نہیںکرسکدے ، قیادت دا کردار ہُندا اے کہ اپنے کارکناں نوں قنون دی لکیر عبور نہ کرن دیوے، عمران نیازی تے پی ٹی آئی قیادت نے حساس، سرکاری تے نجی املاک نوں نقصان پہنچایا، ایہ مناظر پاکستان دی عوام نے کَدی نہیں ویکھے سن،ایمبولینساں توں مریضاں نوں اتار کے گڈیاںساڑ دتیاں گئیاں، سرکاری حکام نوں تشدد دا نشانہ بنایا گیا، افواج پاکستان خلاف کجھ سو مسلح جھتے نوں اُکسان دی مذموم حرکت کیتی گئی ، جیہڑا کم ازلی دشمن75 ورھیاں وچ نہ کرسکیا اواَتگرداں نے کروکھایا۔