سپریم کورٹ نے عمران خان دی گرفتاری غیر قنونی قرار دتی، فوری رہا کرن دا حکم

اسلام آباد(پنجابی میڈیا گروپ)سپریم کورٹ نے سابق وزیراعظم عمران خان دی گرفتاری نوں غیر قنونی قرار دے کے فوری رہا کرن تے اسلام آباد ہائی کورٹ نال رجوع کرن دا حکم دے دتا۔سابق وزیر اعظم عمران خان دی گرفتاری دے خلاف سپریم کورٹ وچ درخواست دی سماعت ہوئی، چیف جسٹس عمر عطا بندیال دی سربراہی وچ 3 رکنی بینچ نے سماعت کیتی، جسٹس محمد علی مظہر تے جسٹس اطہر من اللہ وی بینچ دا حصہ نیں،سپریم کورٹ دے حکم اُتے چیئرمین تحریک انصاف عمران خان نوں اک گھنٹے توں وَدھ تاخیر دے بعد عدالت پیش کیتا گیا، عمران خان نوں ساڑھے4وجے پیش کرن دا حکم دتا گیا سی ۔ سابق وزیر اعظم عمران خان نوں پولیس ہیڈ کوارٹرز توں سپریم کورٹ لیائیا گیا، ایس موقع اُتے سکیورٹی دے سخت ترین انتظام کیتے گئے سن، سکیورٹی دے پیش نظر کمرہ عدالت وچ موجود سارے افراد دی شناخت کیتی گئی، پیشی توں پہلاں عدالت عظمی نے اک گھنٹے وچ پیش کرن دا حکم دتا سی۔ دوبارہ سماعت شروع ہون اُتے اٹارنی جنرل نے عدالت توں استدعا کیتی کہ ایسا فیصلہ نہ کیتا جائے جس نال فیئر ٹرائل اُتے اثر پئے۔دوران سماعت درخواست گزار دے وکیل حامد خان نے عدالت نوں دسیا کہ عمران خان ضمانت قبل از گرفتاری لئی اسلام آباد ہائیکورٹ آئے سن، عمران خان بائیو میٹرک کروا رہے سن جَد رینجرز کمرے دا دروازہ توڑ کے داخل ہوئی، رینجرز نے عمران خان دے نال بدسلوکی کیتی تے اوہناں نوں گرفتارکیتا، عمران خان نوں 80 توں 90 افراد نے گرفتارکیتا۔چیف جسٹس نے آکھیاکہ90 افراد عدالت دے احاطہ وچ داخل ہوئے تے عدالت دی کیا توقیر رہی؟ نیب نے عدالت دی توہین کیتی اے، نیب ایس قسم دیاں حرکتاں پہلاں وی کرچکیا اے، نیب نے اک ملزم نوں سپریم کورٹ پارکنگ توں گرفتارکیتا سی، عدالت نے گرفتاری واپس کروائی تے نیب دے خلاف کاروائی ہوئی سی، معاملہ عدلیہ دے احترام دا اے۔