اسلام آباد ہائیکورٹ داعمران خان نوں17مئی تک کسی نویں مقدمہ وچ گرفتار نہ کرن دا حکم

اسلام آباد(پنجابی میڈیا گروپ)اسلام آباد ہائیکورٹ نے عمران خان نوں17مئی تک کسی وی مقدمے وچ گرفتار نہ کرن دا حکم دی دتا۔اسلام آباد ہائی کورٹ وچ عمران خان دی ضمانت قبل از گرفتاری دی درخواست اُتے سماعت ہوئی، سماعت اُتے عمران خان وی کمرہ عدالت وچ موجود سن۔بیرسٹر سلمان صفدر نے عدالت نوں دسیا کہ ایس ضمانت دی درخواست اُتے رجسٹرار آفس دا اعتراض اے، 9 مئی نوں 2 کیساں وچ ہائی کورٹ پیش ہونا سی، عدالت نے پہلاں وی 2 مقدمیاں وچ ضمانت دے کیس کچہری نوں نہیں گھلے، عدالت نے 2 مقدمیاں وچ ضمانت دے کیس اپنے کول ہی رکھے، ایف 8 کچہری وچ لا اینڈ آرڈر دی صورت حال پاروں دونوں کیس ہائی کورٹ وچ نیں۔اوہناںنے استدعا کیتی کہ ایس کیس نوں وی ہائی کورٹ وچ ہی سُنیا جائے۔بیرسٹر سلمان صفدر نے عدالت وچ دلائل دیندیاں ہویاں آکھیا کہ ایہ پلس کیس اے جس وچ ضمانت قبل از گرفتاری لئی عدالت نال رجوع کیتا، اک درخواست کل چھیتی وچ وی دائر کیتی اے، عمران خان دی گرفتاری نوں سپریم کورٹ نے غیر قنونی قراردتا، گرفتاری غیر قنونی قرار دتے جان دے باوجود اوہ اجے وی پلس پروٹیکشن وچ نیں، ملک وچ امن و امان دی صورت حال خراب سی، اج ساہنوں وی کورٹ آن وچ بوہت ساریاں مشکلاں دا سامنا کرنا پئیا، عمران خان دا گرفتاری دے بعد کسی نال کوئی رابطہ نہیں سی، عمران خان نے سپریم کورٹ وچ وی دسیا کہ اوہ ملکی حالات توں بے خبر سن۔جسٹس میاں گل حسن نے سوال کیتا کہ کیا پٹیشنر دی پالیسی اے کہ ریاستی رٹ چیلنج کرن والیاں دے خلاف کارروائی ہونی چاہیدی؟وکیل سلمان صفدر نے آکھیا کہ جی!پٹیشنر نے سپریم کورٹ وچ وی ساریاں چیزاں واضح کردتیاں سن۔چیئرمین پی ٹی آئی دے وکیل نے استدعا کیتی کہ عدالت عمران خان نوں کسی نامعلوم مقدمے وچ گرفتار نہ کرن دا حکم وی جاری کرے۔جسٹس میاں گل حسن نے سوال کیتا کہ ایس احاطے توں جیہڑی غیر قنونی گرفتاری ہوئی کیا اوس دا مقدمہ درج ہویا؟اسلام آباد ہائی کورٹ دے سامان دی توڑ پھوڑ ہوئی۔اسلام آباد ہائی کورٹ نے حکم دتا کہ17مئی تک عمران خان نوں کسی نویں مقدمہ وچ گرفتار نہ کیتا جائے۔جسٹس میاں گل حسن اورنگزیب نے حکم دتا کہ عمران خان واضح ڈیکلریشن دیون کہ جو کجھ ہویا اوس دی مذمت کردے ہاں۔اسلام آباد ہائی کورٹ نے ایہ حکم وی دتا کہ ریاست عمران خان دی سکیورٹی یقینی بنائے۔