12مئی دے شہیداں دیاں قربانیاں ایس لئی نہیں سن کہ کوئی عدالتی سلطان بنے،بلاول بھٹو

کراچی(پنجابی میڈیا) وزیر خارجہ تے پاکستان پیپلزپارٹی دے چیئرمین بلاول بھٹو زرداری نے آکھیا اے کہ جَد تک من مانی تشریحاں دا چلن رہے گا، انصاف دا بول بالا نہیں ہوئے گا،سانحہ12مئی دے شہیداں دیاں قربانیاں ایس لئی نہیں سن کہ کوئی عدالتی سلطان بنے۔بلاول بھٹو زرداری نے خصوصی پیغام وچ سانحہ 12مئی کراچی دے شہیداں نوں خراج عقیدت پیش کردیاں ہویاں آکھیا کہ ملک وچ آزاد عدلیہ دے خواب نوں حقیقت وچ بدلن لئی شہیداں نے جاناں قربان کیتیاں۔اوہناں نے آکھیا کہ عالمی رینکنگ وچ پاکستانی عدلیہ جس نمبر اُتے کھڑی اے، دنیا اگے قوم لئی باعثِ شرمندگی اے، ساڈا نظام انصاف عوام نوں مفت و فوری انصاف دی فراہمی دی منزل توں اج وی بوہت دور اے۔اوہناںنے آکھیا کہ قربانیاں ایس لئی نہیں سن کہ عدالتی سلطان عوام دی منتخب حکومت نوں اپنے سیاسی عزائم خاطر چلن ہی نہ دیوے، جَد تک جسٹس منیر تے افتخار چوہدری دی من مانی تشریحاں دا چلن رہے گا،انصاف دا بول بالا نہیں ہوئے گا۔