سابق وزیر اعلیٰ پنجاب چودھری پرویز الٰہی گرفتار

لہور(پنجابی میڈیا گروپ)تحریک انصاف دے مرکزی صدر تے سابق وزیر اعلی پنجاب چودھری پرویز الہی نوں گرفتار کر لئیا گیا۔صدر تحریک انصاف چودھری پرویز الہی نوں گرفتار کرن لئی پلس نے چودھری پرویز الہی دی رہائشگاہ تے نیڑے سڑک نوں گھیررکھیا سی۔پلس نے چودھری پرویز الہی دی گڈی نوںظہور الہی روڈ دے گول چکر اُتے ناکے اُتے گھیرے وچ لے کے اوہناں نوں گرفتار کر لئیا، پرویز الہی دے ترجمان نے دسیا کہ چودھری پرویز الہی دی گڈی دے شیشے وی توڑے گئے۔سابق وزیر اعلی پنجاب نوں اوہناں دی رہائش گاہ دے نیڑے توں گرفتارکیتا گیا، پلس اوہناں دی ریکی کر رہی سی، گرفتاری ویلے پلس دی بھاری نفری موقع اُتے موجود سی، پرویز الہی دے ترجمان نے گرفتاری دی تصدیق کردتی ۔ دسیا گیا اے کہ پرویز الہی نوں گرفتار کر کے اینٹی کرپشن دے حوالے کر دتا گیا، چودھری پرویز الہی اینٹی کرپشن گوجرانوالہ نوں مطلوب سن، پلس دے اعلی حکام وی ظہور الہی روڈ اپڑ گئے۔نگران وزیر اطلاعات عامر میر نے اک نجی پروگرام وچ گل کردیاں ہویاں آکھیا کہ اینٹی کرپشن والیاں نے پرویز الہی نوںگرفتار کیتا اے، پلس نے علاقے نوں کافی دناں توں سیل کیتا ہویا سی۔اوہناں نے دسیا کہ اج اوہناں دے گھروں3 گڈیاں نکلیاں تے اوہناں نوں تلاشی لئی روکیا گیا، گڈی دا شیشہ توڑیا تے اندرپرویز الہی موجود سن۔عامر میر دا کہنا سی کہ اینٹی کرپشن حکام چودھری پرویز الہی دی گرفتاری دے حوالے نال کجھ دیر بعد تفصیل نال میڈیا اُتے شیئر کرن گے۔چودھری پرویز الہی دی گرفتاری دے بعد پلس آپریشن مکمل ہوئے گیا، جس دے بعد ظہور الہی روڈ نوں ٹریفک لئی کھول دتا گیا اے۔واضح رہے کہ پلس 10 دناں توں ظہور الہی روڈ نوں بند رکھے ہوئے سی، پلس بدستور ظہور الہی روڈ اُتے موجود اے۔