پرویز الٰہی دا جسمانی ریمانڈمسترد،14دناں لئی جوڈیشل ریمانڈ منظور

لہور(پنجابی میڈیا گروپ)جوڈیشل مجسٹریٹ نے جسمانی ریمانڈدی استدعا مسترد کردیاں ہویاں چودھری پرویز الہٰی نوں 14 دن لئی جوڈیشل ریمانڈ اُتے جیل گھلن دی ہدایت کردتی ۔ سابق وزیر اعلیٰ پنجاب چودھری پرویز الہٰی دے خلاف پنجاب اسمبلی وچ غیرقنونی بھرتیاں دے کیس دی سماعت ہوئی، سماعت جوڈیشل مجسٹریٹ غلام مرتضیٰ ورک نے کیتی، دوران سماعت اینٹی کرپشن ولوں چودھری پرویز الہٰی دے 14 دن لئی جسمانی ریمانڈ دی استدعا کیتی گئی۔جوڈیشل مجسٹریٹ غلام مرتضیٰ ورک نے محفوظ فیصلہ سناندیاں ہویاں اینٹی کرپشن ولوں کیتی گئی جسمانی ریمانڈ دی استدعا مسترد کر دتی تے چودھری پرویز الہٰی نوں ایس توں پہلاں پنجاب اسمبلی وچ غیر قنونی بھرتیاں دے کیس وچ اینٹی کرپشن ولوں تحریک انصاف دے صدر چودھری پرویز الہٰی نوں لہور کچہری وچ پیش کیتا گیا، دوران سماعت اینٹی کرپشن ولوں معزز جوڈیشل مجسٹریٹ غلام مرتضیٰ ورک اُتے عدم اعتماد دا اظہار کر دتا گیا۔اینٹی کرپشن نے ایس حوالے نال موقف اپنایا کہ جوڈیشل مجسٹریٹ غلام مرتضیٰ ورک دے ٹوئٹر تے فیس بک اُتے پیج نیں، سیشن جج صاحب اوس کیس لئی کسی ہور جج دا انتخاب کرن ۔ فاضل جج نے آکھیا کہ تُسی لوکاں نے میرے خلاف درخواست دے دتی ، میرا کوئی فیس بک اکاؤنٹ نہیں اے، میرا کوئی وی سوشل میڈیا اکاؤنٹ نہیں اے، کل تُسی گوجرانوالہ وچ گئے اوتھے میں بیٹھیا ہویا ساں، میرے کیس سنن نال تہانوں اعتراض اے تُسی سیشن جج دے کول چلے جان ۔پرویز الہٰی دے وکیل رانا انتظار نے اپنے دلائل وچ آکھیا کہ ایف آئی آر دی کاپی ساہنوں نہیں دتی گئی، تہاڈے ایہ کیس سنن اُتے اعتراض کر دتا گیا اے، جس دے بعد عدالت نے سماعت وچ کجھ دیر لئی وقفہ کر دتا۔وقفے بعد سماعت شروع ہوئی تے جوڈیشل مجسٹریٹ غلام مرتضیٰ ورک نے ریمارکس وچ آکھیا کہ میں اوہی جج ہاں جس نے پی ٹی آئی کارکناں دا ریمانڈ دتا، میرا منصب مینوں بولن دی اجازت نہیں دیندا، میں تہاڈی حمایت دی گل کراں تے ٹھیک نہ کراں تے غلط ۔ جوڈیشل مجسٹریٹ نے ہور آکھیا کہ تہاڈی یاددہانی لئی میں اوہی جج ہاں جس نے محمد خان بھٹی دا ریمانڈ دتا،اج کیس سنن اُتے اعتراض ہو رہیا اے، اگر تہانوں میرا فیصلہ پسند نہیں تے تُسی چیلنج کر دیو۔دوران سماعت تفتیشی افسر نے عدالت نوں دسیا کہ چودھری پرویز الہٰی دے خلاف ثبوت موجود نیں، تفتیش لئی ریمانڈ درکار اے ، پرویز الہٰی دے وکیل رانا انتظار نے آکھیا کہ ایہ ستویں ایف آئی آراے جیہڑی پرویز الہٰی دے خلاف کیتی گئی اے، الزام اے اک اجلاس دی صدارت کردیاں ہویاں نا اہل امیدواراںنوں بھرتی کیتا گیا، اینٹی کرپشن دی اتھارٹی نہیں اے کہ اوہ وزیراعلیٰ دے خلاف کوئی کارروائی کرے، اینٹی کرپشن ولوں کوئی وی کم قنون مطابق نہیں کیتا گیا، وزیر اعلی دے کول کسی نوں وی بھرتی کرن دا ہر قسم دا اختیار اے۔