چودھری پرویز الٰہی نوں اعلی عدلیہ دی حمایت حاصل اے:عطااللہ تارڑ

اسلام آباد(پنجابی میڈیا گروپ)وزیر اعظم دے معاون خصوصی عطا اللہ تارڑ نے آکھیا اے کہ9مئی دے ملزم، چودھری پرویز الہی کیس دی پیروی کرن گے، اینہاں مقدمیاں نوں منطقی انجام تک پہنچان گے،9 مئی دے واقعات وچ ملوث افراد کسی رعایت دے مستحق نہیں، قنون و انصاف ہُنداہویا نظر آنا چاہیدااے۔اسلام آباد وچ پریس کانفرنس کردیاں ہویاں عطا اللہ تارڑ نے آکھیا کہ شرپسند عناصر نے 9مئی نوں جلا گھیرا کیتا،9 مئی نوں تریخ وچ سیاہ ترین دن دے طوراُتے یادرکھیا جائے گا، ڈاکٹر یاسمین راشد نوں عدالت ولوں ریلیف دتا گیا، کیس اندر آکھیا گیا یاسمین راشد ایف آئی آر وچ نامزد نہیں اے، عجلت وچ فیصلہ کیتا گیا۔وزیر اعظم دے معاون خصوصی نے آکھیا کہ ایف آئی آر دی ضمنی وچ بطور ملزمہ یاسمین راشد دا نام درج اے، فرانزک لیب دے مطابق یاسمین راشد موجود سن، ایہنی کیہ چھیتی سی رپورٹ داانتظارکیتیوں بغیر عدالت نے فیصلہ سنا دتا، ایہ سمجھن توں قاصر ہاں عدلیہ دے کجھ مخصوص حلقے اینہاں غیرسنجیدہ رویہ کیوں رکھدے نیں۔