ملک دے بالاں دے محفوظ تے صحتمند مستقبل لئی ہر کسی نوں پولیو ختم کرن دے مقدس مشن دا حصہ بننا ہوئے گا،نگران وزیر اعظم

اسلام آباد(بیوروروپورٹ)نگران وزیر اعظم انوار الحق کاکڑنے آکھیا اے کہ ملک دے بالاں دے محفوظ و صحتمند مستقبل لئی ہر کسی نوں پولیو ختم کرن دے مقدس مشن دا حصہ بننا ہوئے گا،علما ، استاد، ماپے تے سارے اسٹیک ہولڈراں نوں انسداد پولیو دی آگہی مہم دا حصہ بنایا جائے،انسداد پولیو مہم دے دوران پولیو ورکراں دی سیکیورٹی یقینی بنائی جائے،ملک وچ پولیو دے کیس نمایاں گھٹ گئے نیں مگر ملک توں ایس موذی مرض نوں جڑوں ختم کرن لئی اسیں اپنی بھرپور کوششں جاری رکھاں گے۔ پیر نوں نگران وزیر اعظم انوار الحق کاکڑ دی زیرِ صدارت انسداد پولیو دی نیشنل ٹاسک فورس دا اجلاس ایتھے منعقد ہویا۔جس وچ اظہار خیال کردیاں ہویاں وزیر اعظم نے آکھیا کہ پولیو دے ملک توں مکمل خاتمے لئی معاشرے دے ہر طبقے نوں ایس قومی فریضے وچ اپنا کردار ادا کرنا ہوئے گا۔ اونہاں نے آکھیاکہ ملک دے بالاں دے محفوظ تے صحتمند مستقبل لئی ہر کسی نوں ایس مقدس مشن دا حصہ بننا ہوئے گا ۔ وزیر اعظم نے ہدایت کیتی کہ علما ، استاد،ماپے تے سارے اسٹیک ہولڈراں نوں انسداد پولیو دی آگاہی مہم دا حصہ بنایا جائے۔