غزہاتے اسرائیلی بمباری جاری1055فلسطینی شہید،عورتاں تے بال وی شامل

تل ابیب(پنجابی میڈیا گروپ)حماس دے طوفان الاقصی آپریشن وچ اسرائیلی ہلاکتاں دی تعداد1200 توںودھ ہوگئی جد کہ غزہ اتے جاری اسرائیلی بمباری وچ شہید فلسطینیاں دی تعداد1050 تک اپڑ گئی تے 5 ہزار توں ودھ افراد زخمی نیں۔عالمی خبر رساں ادارے مطابق فلسطینی حریت پسند تنظیم حماس دے اسرائیل اتے تریخی تے حیران کن حملے بعد اسرائیلی فوج دی غزہ اتے بمباری جاری اے، اسرائیلی افواج بلاامتیاز رہائشی عمارتاں، عورتاں تے بالاں نوں وی نشانہ بنارہی اے جس دے سبب ہلاکتاں دی تعداد ودھ دی جارہی اے۔غزہ اتے جاری بمباری دے سبب تاحال غزہ توں 1لکھ 87 ہزار فلسطینی باشندے بے گھر ہو کے کیمپاں وچ پناہ گزیں ہوچکے نیں تے اونہاں دی تعداد ودھ ہندی جا ری اے۔دوجے پاسے اسرائیل دی ہیلتھ منسٹری نے اپنے 1200 شہریاں دی ہلاکت تے 2700 شہریاں دے زخمی ہون دی تصدیق کیتی اے۔واضح رہے کہ جمعہ تے ہفتے دی درمیانی شب حماس دے اچانک حملے بعد توں اسرائیلی فوج ہن تک سنبھل نہیں پائی اے۔ مختلف جھڑپاں وچ ہلاک ہون والے اسرائیلی ہلاکتاں دی تعداد ودھ ہندی جارہی اے جنہاں وچ 100 توں ودھ فوجی تے پلس اہلکارسنے غیر ملکی شہری وی شامل نیں۔ایس توں پہلاں اسرائیلی فوج نے بزدلانہ کارروائی وچ غزہ اندر حماس دے کمانڈراںدے گھراں اتے ساری رات بمباری کی۔