عالمی برادری پاکستان دے نال مل کے غزہ وچ سیز فائر دی بھرپور کوشش کرے: دفتر خارجہ

اسلام آباد( پنجابی میڈیا گروپ)دفتر خارجہ نے آکھیا کہ عالمی برادری پاکستان دے نال مل کے غزہ وچ سیز فائر دی بھرپور کوشش کرے ۔ ترجمان دفتر خارجہ ممتاز زہرہ بلوچ نے ہفتہ وار میڈیا بریفنگ دے دوران آکھیا کہ نہتے فلسطینیاں اُتے اسرائیل دے مظالم دی شدید مذمت کردے ہاں، فلسطینیاں دے خلاف اسرائیل امتیازی سلوک اپنا رہیا اے، غزہ وچ شہری آبادی نوں نشانہ بنایا جا رہیا اے، اسرائیلی بمباری نال معصوم جاناں دا ضیاع ہو رہیا اے، غذائی شیواں روکنا انسانی حقوق دی خلاف ورزی اے۔اونہاں نے آکھیا کہ مشرق وسطی وچ قیام امن ویلے دی اہم لوڑ اے، عالمی برادری پاکستان دے نال مل کے غزہ وچ سیز فائر دی بھرپور کوشش کرے، پاکستانی فلسطینی مسئلے دے مضبوط حامی نیں، وفاقی کابینہ نے وی اسرائیلی جارحیت دی مذمت کیتی اے، پاکستان او آئی سی دا مستقل رکن اے تے او آئی سی دا خصوصی اجلاس بلان لئی کوشش کر رہیا اے۔