پی ٹی آئی رہنماواں دی بار بار گرفتاری اُتے پشور ہائی کورٹ غصے وچ

پشور(پنجابی میڈیا گروپ) عدالتی حکم دے باوجود پی ٹی آئی رہنماواں دی بار بار گرفتاری اُتے چیف جسٹس پشور ہائی کورٹ غصے وچ آگئے جس اُتے آئی جی تے چیف سیکریٹری نے رہنماواں نوں دوبارہ گرفتار نہ کرن دی یقین دہانی کرادتی ۔ پی ٹی آئی دے سابق سٹی صدر عرفان سلیم دی غیر قنونی حراست خلاف درخواست اُتے پشور ہائی کورٹ وچ سماعت ہوئی۔ چیف سیکرٹری، آئی جی پلس، ایڈووکیٹ جنرل تے درخواست گزار وکیل علی زمان عدالت وچ پیش ہوئے۔چیف جسٹس محمد ابراہیم خان نے آکھیا کہ عدالتی حکم دی بار بار خلاف ورزی ہورہی اے، عدالت ملزماں نوں عبوری ضمانت دیندی اے لیکن عدالتی حکم دے باوجود اونہاں نوں دوبارہ گرفتار کرلئیا جاندا اے، تُسی ساہنوں یقین دہائی کراو کہ آئندہ عدالتی حکم دی خلاف ورزی نہیں ہوئے گی۔ چیف جسٹس نے آکھیا کہ تُسی یقین دہانی کرائی اے ساہنوں تہاڈے اُتے اعتماد اے، اوس دے بعد عدالتی حکم دی خلاف ورزی ہوئی تے اسیںکسی دے نال رعایت نہیں کراں گے، اسیں ایہ وی دسنا چاہندے ہاں کہ کوئی غلط فہمی وچ نہ رہے کہ اسیں کسی سیاسی پارٹی دی حمایت کررہے ہاں، کوئی خوش فہمی وچ وی نہ رہے کہ اسیں کسی توں متاثر ہو کے ایسا کر رہے ہاں،اسیں جو کررہے ہاں صرف قنون مطابق کررہے ہاں۔جسٹس اشتیاق ابراہیم نے آکھیا کہ تُسی آئین دی کتاب اُتے چلو جو قنون کہندا اے اوہ کرو، جیہڑا قنون دی خلاف ورزی کرے گا اوہناںلئی کوئی رعایت نہیں ہونی چاہیدی قنون سب لئی برابر اے، عدالت وچ جو وی ہوئے گا قنون مطابق ہوئے گا۔چیف جسٹس نے چیف سیکرٹری تے آئی جی پلس دی یقین دہانی اُتے درخواست نمٹا دتی۔