عالمی بینک نے پاکستان نوں15کروڑ ڈالر فراہم کرن لئی رضامندی ظاہرکردتی

لہور( پنجابی میڈیا گروپ)عالمی بینک نے پاکستان نوں15کروڑ ڈالر فراہم کرن لئی رضامندی ظاہر کر دتی۔دستاویزاں مطابق پاکستان نوں توانائی سیکٹر منصوبے لئی13کروڑ50لکھ ڈالر بطور قرض ملے گاجدکہ عالمی بینک پاکستان نوں ڈیڑھ کروڑ ڈالر بطور گرانٹ وی فراہم کرے گا۔دستاویزاں مطابق منصوبے دا مقصد توانائی شعبے دی کارکردگی وچ بہتری تے تحفظ اے، کمرشل، انڈسٹریل تے رہائشی عمارتاں نوں گیس توں بجلی اُتے منتقل کیتا جائے گا۔دستاویزاں وچ دسیا گیا کہ منصوبے اُتے عملدر آمد نال سالانہ 291 ارب 65 کروڑ روپے بچت دا تخمینہ لایا اے ، توانائی دی بچت کرن والیاں عمارتاں دی تعمیر دی حوصلہ افزائی کیتی جائے گی۔اوس دے علاوہ توانائی شعبے وچ نجی شعبے دی سرمایہ کاری نوں وی فروغ دتا جائے گا۔