نگران وزیراعلی دی گوجرانوالہ موٹروے لنک نوں مکمل کرن لئی25دسمبر تک دی ڈیڈلائن

لہور(پنجابی میڈیا گروپ)نگران وزیراعلی پنجاب محسن نقوی نے 25 دسمبر تک گوجرانوالہ موٹروے لنک روڈ نوں ٹریفک لئی کھولن دی حتمی ڈیڈ لائن دے دتی۔نگران وزیراعلی محسن نقوی نے گوجرانوالہ دادورہ کیتا جیتھے اونہاں نے لہور، سیالکوٹ موٹروے دے نال گوجرانوالہ نوں لنک کرن لئی زیر تعمیر دو رویہ سڑک دا معائنہ کیتا۔اونہاں نے تعمیراتی سرگرمیاں نوں تیز کرن تے دو رویہ سڑک توں چھیتی مکمل کرن لئی ایف ڈبلیو او دے حکام نوں ہدایت دتی۔نگران وزیراعلی نے 15.2 کلومیٹر بے نظیر چوک توں واہنڈو تک پورے روٹ دا فضائی معائنہ وی کیتا تے روٹ اُتے جاری ترقیاتی کماں دا مشاہدہ کیتا۔بعد وچ نگران وزیراعلی محسن نقوی دی زیر صدارت ایف ڈبلیو او دے کیمپ آفس وچ اجلاس ہویا جس وچ ایف ڈبلیو او حکام نے منصوبہ اُتے ہون والی پیشرفت بارے وزیراعلی پنجاب نوں بریفنگ دتی۔بریفنگ وچ دسیا گیا کہ15.2کلومیٹر طویل روڈ دی تعمیر دے منصوبے اُتے57فیصد کم مکمل ہوچکیا اے، بے نظیر چوک توں واہنڈو انٹر چینج تک زیر تعمیر روڈ اُتے80فیصد ارتھ ورک مکمل کر لئیا گیا اے۔ایس موقع اُتے گل بات کردیاں ہویاں نگران وزیراعلی دا کہناسی کہ 25دسمبر تک منصوبے نوں مکمل کیتا جائے گا، منصوبے نوںمکمل کرن لئی گوجرانوالہ توں لہوردا فاصلہ 45 منٹ گھٹ جائے گا۔