عمران خان دی ضمانت لئی درخواست سماعت کرن والا بینچ ٹُٹ گیا

اسلام آباد(پنجابی میڈیا گروپ)القادر ٹرسٹ تے توشہ خانہ نیب کیساں وچ چیئرمین پی ٹی آئی عمران خان دی ضمانت دیاں درخواستاں اُتے بحالی دی سماعت کرن والا اسلام آباد ہائیکورٹ دا بینچ ٹٹ گیا۔چیف جسٹس عامر فاروق تے جسٹس بابر ستار نے درخواستاں بحال کرن دی درخواست اُتے سماعت کیتی۔ چیئرمین پی ٹی آئی ولوں سردار لطیف کھوسہ نے دلائل د تے۔عدالت نے استفسار کیتا کہ کیا اوہ گرفتار تصور نہیں ہون گے؟ وکیل سردار لطیف کھوسہ نے آکھیا کہ نیب نے اپنا بیان دتا اے کہ اوس نوں گرفتار نہیں کیتا گیا، نیب دا اپنا طریقہ کار اے چیئرمین نیب وارنٹ جاری کردا اے۔نیب پراسیکیوٹر نے آکھیا کہ چیئرمین پی ٹی آئی دے وارنٹ گرفتاری موجود نیں۔عدالت نے نیب توں استفسار کیتا کہ تُسی حراست وچ ہون پاروں اجے تک تفتیش شروع کیوں نہیں کیتی؟ نیب پراسیکیوٹر نے جواب دتا کہ القادر ٹرسٹ تے توشہ خانہ دونوں کیساں وچ وارنٹ گرفتاری موجود نیں، قنونی طور اُتے ایس طرح اسیں تفتیش نہیں کر سکدے۔ عدالت نے پچھیا کہ کیا دوناں کیساں وچ اوس اُتے تحقیقات چل رہیاں نیں؟ نیب پراسیکیوٹر نے دسیا کہ جی تحقیقات چل رہیاں نیں۔درخواستاں اُتے آئندہ سماعت چیف جسٹس عامر فاروق تے جسٹس طارق جہانگیری کرن گے۔ چیف جسٹس نے آکھیا کہ جسٹس طارق جہانگیری دستیاب نہیں، 6 نومبر نوں تہاڈی درخواست مقرر ہو جائے گی۔