صنم جاوید دی پلس افسراں خلاف توہین عدالت دی درخواست اتے سماعت ملتوی

لہور(پنجابی میڈیا گروپ)لہور ہائیکورٹ نے صنم جاوید دی پلس افسراں خلاف دائر توہین عدالت دی درخواست اتے سماعت ملتوی کردتی۔لہور ہائیکورٹ دے جسٹس علی باقر نجفی نے صنم جاوید دی درخواست اتے سماعت کیتی، صنم جاوید نے اپنے وکیل شکیل پاشا ایڈووکیٹ دی وساطت نال درخواست دائر کیتی سی، عدالتی حکم اتے آئی جی پنجاب سنے ہوراں افسراں نے مقدمیاں دی رپورٹ ہائیکورٹ وچ جمع کرائی۔درخواست گزار ولوں موقف اختیار کیتا گیا کہ پلس نے دسیا کہ صنم جاوید اتے2 مقدمے درج نیں، عدالت وچ غلط بیانی کیتی گئی تے صنم جاوید نوں ہور 2مقدمیاں وچ گرفتار کر کے اے ٹی سی عدالت وچ پیش کیتا گیا۔صنم جاوید ولوں درخواست وچ عدالت توں استدعا کیتی گئی کہ لہور ہائیکورٹ پلس افسراں دے خلاف توہین عدالت دی کارروائی کرے۔بعدوچ عدالت عالیہ نے کیس دی ہور10نومبر تک ملتوی کردتی۔