خدیجہ شاہ دی توہین عدالت دی درخواست اتے آئی جی پنجاب نوں جواب جمع کران دی ہدایت

لہور(پنجابی میڈیا گروپ)لہور ہائیکورٹ نے پلس افسراں خلاف خدیجہ شاہ دی درخواست اتے آئی جی پنجاب نوں10نومبر تک جواب جمع کروان دی ہدایت کردتی۔لہور ہائیکورٹ دے جسٹس علی باقر نجفی نے خدیجہ شاہ دی درخواست اتے سماعت کیتی، خدیجہ شاہ ولوں وکیل سمیر کھوسہ ایڈووکیٹ نے دلائل د تے، آئی جی پنجاب ڈاکٹر عثمان انور عدالت دے سامنے پیش ہوئے۔دوران سماعت سرکاری وکیل نے موقف اختیار کیتا کہ تفتیش دا عمل چل رہیا ہندا اے، اگر کوئی نویں چیز سامنے آئے تے اوس نوں شامل کرنا ہندا اے۔آئی جی پنجاب ڈاکٹر عثمان انور نے عدالت نوں دسیا کہ تفتیش دا عمل لمبا تے پیچیدہ اے، ہر چیز قنون مطابق ہو رہی اے، تسی کسی حکم عدولی دا سوال ہی پیدا نہیں ہنداجس اتے جسٹس علی باقر نجفی نے ریمارکس دتے کہ تسی بوہت عمدہ تقریر کیتی اے۔عدالت نے آئی جی پنجاب توں استفسار کیتا کہ تسی رپورٹ جمع کروائی کہ خدیجہ شاہ 2 مقدمیاں وچ نامزد اے، تیجے کیس وچ گرفتاری کسطرح ہوئی؟ کیہ گارنٹی اے کہ اگر خدیجہ نوں ضمانت ملدی اے تے اوس نوں دوبارہ حراست وچ نہیں لئیا جائے گا؟بعد وچ عدالت نے پلس افسراں خلاف خدیجہ شاہ دی توہین عدالت دی درخواست اتے آئی جی پنجاب نون جواب جمع کروان دی ہدایت کردیاں ہویاں کیس دی ہور سماعت10 نومبر تک ملتوی کردتی۔