لہور ہائیکورٹ دا آلودگی پھیلان والیاں فیکٹریاں نوں سیل کرن داحکم

لہور(پنجابی میڈیا گروپ)لہور ہائیکورٹ نے فضائی آلودگی دا سبب بنن والیاں فیکٹریاں نوں سیل کرن دا حکم دے دتا۔لہور ہائیکورٹ دے جسٹس شاہد کریم نے تدارک سموگ بارے شہری فاروق ہارون دی درخواست اتے سماعت کیتی، کمشنر لہور محمد علی رندھاوا عدالت ساہمنے پیش ہوئے۔عدالت نے آلودگی پھیلان والیاں فیکٹریاں نوں سیل کرن دا حکم دیندیاں ہویاں آکھیا کہ جیہڑیاں فیکٹریاں کالا دھواں چھڈ رہیاں نیں اونہاں نوں سیل کیتا جائے، جد تک متعلقہ فیکٹری مالکان بیان حلفی نہیں دیون گے تے ڈی سیل نہیں کیتا جائے گا، بیان حلفی ایہ دیون کہ اگر دوبارہ خلاف ورزی ہوئی تے فیکٹری نوں مسمار کر دتا جائے گا۔کمشنر لہور نے عدالت نوں دسیا کہ دھواں چھڈن والیاں گڈیاں خلاف بلا امتیاز کارروائی کراں گے، اسیں نے ٹریفک پلس نوں وی ہدایت کیتی اے کہ سموگ پھیلان والیاں گڈیاں نوں بند کیتا جائے۔دوران سماعت عدالت نے ریمارکس وچ آکھیا کہ اسیں صحیح رستے اتے جا رہے ہاں، پی ڈی ایم اے تے ستا ہویا اے اسیں اونہاں نوںجگاندے ہاں، اگر کوئی گاڑی سموگ دا باعث بن رہی اے تے اوس دیاں تصویراں بنان۔