اسرائیلی فوج داالمغازی کیمپ اتے رات گئے فضائی حملہ،51فلسطینی شہید

غزہ (پنجابی میڈیا گروپ)اسرائیل ولوں غزہ اتے مسلسل بمباری جاری اے، قابض فوج نے غزہ اتے رات نوںالمغازی کیمپ اتے وڈھا فضائی حملہ کیتا جس دے نتیجے وچ51فلسطینی شہید ہوگئے۔غزہ اتے اسرائیلی فوج دے وحشیانہ حملے پنیجویں ہفتے وچ داخل ہوگئے نیں، ہزاراں بے گھر فلسطینیاںدا مسکن بنن والے اقوام متحدہ دے الفخورا سکول اتے وی بمباری کیتی گئی۔عرب میڈیا مطابق ترجمان وزارت صحت اشرف القدری نے اک بیان وچ آکھیا کہ غزہ دی پٹی وسطی علاقے المغازی کیمپ وچ اسرائیلی فوج دی بمباری دے نتیجے وچ شہید ہون والے30افراد دیاں لاشاں دیر البلاح دے الاقصی شہدا ہسپتال پہنچائیاں گئیاں۔عرب میڈیا دا دسیا اے کہ حماس نے ٹیلی گرام اتے پوسٹ کیتے گئے اک بیان وچ آکھیا کہ اسرائیل نے عام شہریاں دے گھراں اتے براہ راست بمباری کیتی اے، شہید ہون والیاں وچ زیادہ تر عورتاں تے بال شامل نیں۔میڈیا رپورٹس دے مطابق اسرائیلی فوج نے حماس دے سربراہ اسماعیل ہنیہ دے گھر اتے وی ڈرون حملہ کیتا۔اسرائیلی وزیر نے دعوی کیتا کہ اسرائیلی حملیاں وچ حماس دے12 کمانڈر مارے گئے نیں جدکہ اسرائیلی فورسز نے غزہ شہر دا مکمل گھیرا کر رکھیا اے۔ایس دے علاوہ حماس دے عسکری ونگ القسام بریگیڈ دا کہنا اے کہ اسرائیلی فضائی حملیاںپاروں60یرغمالی لاپتا ہو گئے نیں۔