الیکشن وچ سب نوں حصہ لین دا حق اے ،خواجہ سعد رفیق

لہور(پنجابی میڈیا گروپ)پاکستان مسلم لیگ (ن)دے مرکزی رہنما و سابق وفاقی وزیر خواجہ سعد رفیق نے آکھیا اے کہ الیکشن ڈیل دیاں خبراں بے بنیاد نیں، نواز شریف نے واپسی آنا ہی سی ، الیکشن وچ ساریاں نوں حصہ لین دا حق ہونا چاہیدا اے، بیلٹ پیپر اتے ساریاں جماعتاں دے نشان ہونے چاہیدے نیں ، مسلم لیگ(ن)دی کوئی بی ٹیم نہیں ،ساڈھے کول ہر حلقے وچ کئی کئی امیدوار موجود نیں کسی نوں سیٹ ایڈجسٹمنٹ دی ضرورت ہوئے گی تے اوہ آپئی رابطہ کرے گا ،نواز شریف نے سیاسی سرگرمیاں شروع کر دتیاں نیں ، چھیتی سیاسی جماعتاں دے قائدین نال وی ملاقاتاں شروع کراں گے ۔ایہ گلاں اونہاں نے پارٹی دے مرکزی سیکرٹریٹ ماڈل ٹائون وچ میڈیا نال گل بات کردیاں ہویاں کیتیاں ۔ خواجہ سعد رفیق نے آکھیا کہ نواز شریف پارٹی دے مرکزی سیکرٹری آئے تے ہن ایہ سلسلہ جاری رہے گا ، الیکشن دی تریخ آگئی اے تے اسیں تیاریاں شروع کردتیاں نیں ۔ اونہاں نے آکھیا کہ الیکشن ڈیل دیاں خبراں بے بنیاد نیں ، نواز شریف نے واپس آنا ہی سی ، کیا نواز شریف دے مقدر وچ لکھیا اے کہ زندگی بھر جلا وطنی کٹن گے ، کیا کسی خلاف جھوٹے مقدمے ہون تے اونہاں نوں ختم نہیں ہونا چاہیدا ، جنہی تکلیف نواز شریف ، اونہاں دے خاندان ، جماعت نے کٹی کیا کسی ہور نے کٹی ، ڈاکٹراں نے ٹریول دی اجازت دتی تے نواز شریف پاکستان آئے نیں، کیا ساڈھے ہتھ دیاں لکیراں وچ لکھیا اے کہ اسیں سزاواں کٹنیاں نیں۔