ترقی دا سفر جیتھوں رُکیا اوتھوں ہی شروع کراں گے، نواز شریف

لہور (پنجابی میڈیا گروپ)پاکستان مسلم لیگ (ن)دے قائد و سابق وزیر اعظم محمد نواز شریف نے باقاعدہ طور اتے سیاسی سرگرمیاں شروع کر دتیاں ، پارٹی رہنماواں نوں عام الیکشن دی بھرپور تیاری کرن دی ہدایت کردیاں ہویاں آکھیاکہ ترقی دا سفر جیتھوں رکیا اوتھوں شروع کراں گے، بوہت چھیتی پاکستان نوں ایشین ٹائیگر بناواں گے،کارکناں دے تریخی جذبے تے قربانیاں نوں کدی نہیں بھلا سکدا۔ایہہ گلاں دا اظہاراونہاں نے 4ورھیاں بعد پارٹی دے مرکزی سیکرٹریٹ 180 ایچ ماڈل ٹائون آمد دے موقع اتے پارٹی رہنماواں نال ملاقاتاں دے دوران کیتیاں ۔ نوازشریف دی مرکزی سیکرٹریٹ وچ ملاقاتاں دے شروع دے نال ہی مسلم لیگ (ن) دی االیکشن مہم نویں مرحلے وچ داخل ہو گئی اے۔مرکزی سیکرٹیریٹ آمد اتے پارٹی صدر شہباز شریف نے ہوراں رہنماواں دے نال محمد نواز شریف دا استقبال کیتا۔ ایس موقع اتے پارٹی دی سینئر نائب صدر و چیف آرگنائزر مریم نواز اونہاں دے نال سن ۔پارٹی صدر شہباز شریف نے قائد نواز شریف نوں مرکزی سیکریٹریٹ آمد اتے مبارک پیش کیتی۔