غزہ:2جنوبی شہراں اُتے ساری رات بمباری

غزہ ( پنجابی میڈیا گروپ) اسرائیل نے مظلوم فلسطینیاں اُتے قیامت ڈھا دتی، غزہ وچ ہسپتالاں اُتے حملے جاری نیں، غزہ دے 2جنوبی شہر رفح تے خان یونس دے نیڑے بمباری کیتی گئی جس دے نتیجے وچ ہور23افراد شہیدجدکہ کئی زخمی ہوگئے ۔اسرائیلی بمباری نال غزہ کھنڈر بن گیا اے ، صیہونی فورسز نے شہراں اُتے حملیاں وچ رہائشی عمارتاں نوں نشانہ بنایا اے ، اسرائیلی فوج نے نصر میڈیکل کمپلیکس اُتے بم مار دتے، القدس تے کمال عدوان ہسپتال دے نیڑے وی بمباری کیتی گئی جدکہ بالاں دے الرنتیسی ہسپتال نوں وی خالی کرن دی دھمکی دتی گئی اے ۔اسرائیلی فضائیہ نے الشاطئی کیمپ اُتے وی 2 مکاناں اُتے بم مار دتے، ایس حملے وچ کئی شہریاں دیاں موتاںدا خدشہ اے۔اسرائیلی فوج نے اک وار فیر غزہ دے لوکاں نوں جنوب وَل ہجرت کرن دی دھمکی دتی اے جدکہ ترجمان اسرائیلی فوج داکہنا اے کہ فضائی حملیاں دے نال نال زمینی کارروائیاں تیز کر رہے نیں ۔ادھر عالمی امدادی ادارہ ہلال احمر نے7اکتوبرحماس دے حملے بعد شروع ہون والی اسرائیلی جارحیت روکن دا مطالبہ کردیاں ہویاں آکھیا اے کہ شہریاں دی بدترین حالت خاص طور اُتے بالاں دی حالت نوں ویکھدیاں ہویاں ایس ظلم نوں روکا جائے۔