سائفر کیس: عمران تے شاہ محمود دے وکیل پیش نہ ہوئے، سماعت14نومبر تک ملتوی

راولپنڈی(پنجابی میڈیا گروپ)سائفر کیس وچ چیئرمین پاکستان تحریک انصاف عمران خان تے وائس چیئرمین پی ٹی آئی شاہ محمود قریشی دے وکیل پیش نہ ہون پاروں گواہواں دے بیان ریکارڈ نہ ہو سکے۔سائفر کیس دی سماعت اڈیالہ جیل وچ سیکریٹ عدالت دے جج ابو الحسنات ذوالقرنین نے کیتی، چیئرمین پی ٹی آئی عمران خان تے وائس چیئرمین شاہ محمود قریشی کمرہ عدالت وچ پیش ہوئے لیکن اونہاں دے وکیل ہور عدالتاں وچ مصروف ہون پاروں پیش نہ ہو سکے تے جونیئر وکیلاں ولوں سماعت ملتوی کرن دی استدعا کیتی گئی۔سائفر کیس وچ ایف آئی اے دے اسپیشل پراسیکیوٹر ذوالفقار عباس نقوی نے میڈیا نال گل بات کردیاں ہویاں دسیا کہ وکیل صفائی دی درخواست کیتی کہ اوہ لہور وچ نیں، اسموگ پاروں نہیں آ سکدے، آئندہ سماعت اُتے6 گواہواں دے بیانات ریکارڈ کران گے۔اسپیشل پراسیکیوٹر نے دسیا کہ مجموعی طور اُتے28 گواہ نیں۔