عارف علوی دا فلسطینی صدر نوں فون، اسرائیلی بمباری دی مذمت

اسلام آباد( پنجابی میڈیا گروپ)صدر مملکت ڈاکٹر عارف علوی نے فلسطینی صدر نال ٹیلیفون اُتے رابطہ کیتا، اسرائیلی مظالم دی مذمت کردیاں ہویاں صدر نے نہتے لوکاں اُتے اسرائیلی مظالم اُتے پاکستانی عوام تے حکومت ولوں دلی ہمدردی تے غم دا اظہار کیتا۔صدر مملکت ڈاکٹر عارف علوی نے آکھیا کہ غزہ دی صورتحال انتہائی تکلیف دہ اے، پوری پاکستانی قوم اسرائیلی سکیورٹی فورسز دی بربریت تے اَت گردی اُتے غمناک اے، صدر مملکت نے اسرائیل ولوں مہلک بمباری، سکولاں، ہسپتالاں نوں وی نشانہ بنان دی مذمت کیتی۔ڈاکٹر عارف علوی نے آکھیا کہ عورتاں، بالاں، شعبہ صحت، صحافیاں تے اقوام متحدہ دے امدادی کارکناں سنے ہزاراں فلسطینی جاں بحق ہوئے، غزہ دی موجودہ صورتحال اسرائیل دیاں دہائیاں دی نسلی تفریق تے غیر منصفانہ پالیسیاں دا ردعمل اے، اونہاں نے مسلماناں دی نسل کشی تے اونہاں نوں اپنے علاقیاں توں بے دخل کرن اُتے اسرائیل دی مذمت کیتی۔