پنجابی زبان دیہاڑ

لہور:پنجاب حکومت لئی تے پنجابی زبان دے حقوق دا19 نکاتی چارٹ تے مطالباتThe 19 Point Charter of the Punjabi Language -2024 29 مارچ 1849 توں لے کے 29 مارچ 2024 تک اج پورے1سو75 ورھے ہوچکے نیں پنجاب اُتے انگریز دے قبضے دے بعد صوبے وچ لازمی بنیادی تعلیمی اپنی مادری زبان پنجابی وچ دین اُتے تے اس دے پنجاب دی تعلیمی، سرکاری،دفتری تے عدالتی زبان بنن اُتے لگی سرکاری پابندی نوں۔جیہڑا قیام پاکستان دے بعد اج وی جوں دا توں جاری اے پنجابی دنیا دی 10ویں وڈھی زبان اے۔مگر دنیا دی سب توں مظلوم زبان وی اے کیوں کہ ایہ پچھلے پونی 2صدیاں توں منظم سرکاری ظلم،جبر،ا ستحصال، نفرت تے امتیازی سلوک داشکارزبان اے۔ایہہ گلاں پنجابی لینگوئج موومنٹ دے بانی چیئرمین چوہدری نظیر کوٹ نے اج 29 مارچ والے دن نوںپنجابی زبان دیہاڑ (پنجابی لینگوئج ڈے)نوں بطور یوم احتجاج دے طور اُتے منائے جان دے موقع اُتے پنجاب ہاوس لہور وچ پنجاب بھر توں آن والے پنجابی دانشوراں،لکھاریاں، استاداں، سپورٹراں تے سوشل ایکٹویسٹس تے کارکناں دے اک نمائندہ اجتماع نال خطاب دے دوران کیتیاں۔ پنجابی زبان دیہاڑ /پنجابی لینگوئج ڈے ایس اجتماع وچ پنجاب بھر توں آئے ڈیڑھ سو توں وَدھ ممتازپنجابی دانشوراں، لکھاریاں،استاداں قوم پرستاں،شاعراں تے لکھاریاں نے رَلت کیتی،کانفرنس دی صدارت چوہدری الیاس گھمن ہوراں کیتی جدکہ ڈاکٹرنبیلہ رحمن پرنسپل اورئینٹل کالج لہور نے اُچیچی پروہنے دے طوراُتے ایس اجتماع نال خطاب کیتا،پنجابی لینگوئج ڈے دی میزبانی دے فرائض ممتاز ملک نے ادا کیتے ۔ پنجابی زبان دیہاڑ دے ایس اجتماع وچ ممبر پنجاب اسمبلی موتیا مسعود خالد نے اُچیچی رَلت کیتی تے اپنے خیالات دا اظہار کیتا انگلینڈ مانچسڑ توں کانفرنس دے چیف آرگنائیزر بیرسٹر عمیر منظور تے نیویارک توں سینئر پنجابی لکھاری ، تے سوشل ایکٹویسٹ شہزاد ناصر نے وی خطاب کیتا۔پنجابی زبان دیہاڑ دے ایس خصوصی اجتماع نال دے ہورمقرریناں جنہاں وچ ،ڈاکٹر ارشد اقبال ارشد ڈاکٹر کلیان سنگھ ،ظاہرحسین بھٹی،راشد محمود،پروفیسر عباس مرزا، ڈاکٹر ظفر مقبول عبدالغفار رندھاوا اسلم شوق وحید ناز زاہد صدیقی۔ڈاکٹر ستونت کور ۔ہرجندر سنگھ دلگیر ۔چوہدری خالد ۔ارشد علی کامریڈ عرفان ۔ندیم رضا زاہد حسن،ڈاکٹر نگہت خورشید،حسنین بھٹی،انور عزیز چانڈیو، عدل منہاس لہوری ۔عبدالقدوس کیفی احمد اقبال بزمی خالد اعجاز مفتی بلال مدثر سعید مکرم تے یوسف پنجابی شامل سن پنجابی زبان نوں درپیش مسائل حل کرن بارے تجویزاں دتیاں تے پنجابی زبان نوں پنجاب وچ اوس دے آئینی تے قنونی حقوق محرومی اُتے فکر مندی ظاہرکیتی۔چوہدری الیاس گھمن نے اپنے صدارتی خطاب وچ پنجابی زبان دے خلاف روا رکھے جان والے امتیازی سلوک دی سخت مذمت کیتی۔ تے پنجابی زبان دے آئینی وقنونی حقوق دی بحالی دا مطالبہ کیتا۔میزبان محفل مدثر اقبال بٹ سن اونہاں نے پنجاب ہاوس وچ آن والے پروہنیاں نوں جی آیاں نوںکہندیاں ہویاں19 نکات اُتے مشتمل چارٹر آف پنجابی لینگوئج کانفرنس وچ منظوری لئی پیش کیتاجس نوں ساریاں رَلتیاں نے اتفاق رائے نال منطور کرلیا۔کینیڈا توں پنجابی لینگوئج موومنٹ دے بانی چئیرمین چوہدر ی نظیر کہوٹ نے پنجاب دی تریخ وچ 29 مارچ 2024 دے دن نوںپہلی وار پنجابی زبان دیہاڑ یا پنجابی لینگوئج ڈے کانفرنس دے طور اُتے منان دی تریخی وجہ بیان کیتی۔چوہدر ی نظیر کہوٹ نے اپنے خصوصی خطاب وچ 29 مارچ 1849 دے دن نوں پنجاب دی تریخ دا اک منحوس تے سیاہ ترین دن قرار دیندیاں ہویاں آکھیا کہ 1سو75 ورھے پہلاں ایسی دن آزاد تے خودمختار پنجابی ریاست اُتے ایسٹ انڈیاکمپنی نے قبضہ کرن دے نال ہی پنجابی زبان دے پنجاب دی تعلیمی،سرکاری،دفتری زبان بنن اُتے پابندی لا دتی۔جس نوں قیام پاکستان دے بعد پچھلے 77ورھیاں وچ پنجاب اندر برسرقتدار آن والی ہر حکومت نے برقرار رکھیا۔پنجابی لینگوئج موومنٹ دی چھتر چھاویں منعقدہ ایس کانفرنس نے پنجابی لینگوئج ڈے اُتے پنجابی زبان دے چارٹر دی منظوری دتی جس وچ مطالبہ کیتا گیا کہ پنجاب حکومت آفیشل لینگوئج ایکٹ یا پنجابی لینگوئج ایکٹ دا قنون پاس کرے،چارٹر آف پنجابی لینگوئج نافذ کرن لئی ضروری قنون سازی کرے۔پنجابی لینگوئج کمشنرداخودمختار ادارہ قائم کرے۔پنجاب کلچرڈے نہیں سارے پنجاب وچ اک ہی دن اک ہی’’پنجابی کلچرڈے‘‘سرکاری طوراُتے منان دا اعلان کرے۔پنجابدی کسی وی قسم دی تقسیم نامنظور۔ن لیگ دی پنجاب حکومت تے وفاقی حکومت کمشن برائے تقسیم پنجاب فوری طور اُتے ختم کرے۔ پنجاب حکومت پنجابی دے لہندے لہجے(Western Dialect) نوںمعیاری پنجابی زبان دے طور اُتے سارے پنجاب وچ ذریعہ تعلیم تے سرکاری تے دفتری زبان کے طور پر نافذکرے۔ چارٹر آف پنجابی لینگوئج وچ مطالبہ کیتاگیا کہ پنجاب حکومت سپریم کورٹ دے 8 ستمبر 2015 دے حکم مطابق آئین تے آئین دے آرٹیکل 251 دے سیکشن 3 تے آرٹیکل 28 تحت پنجابی نوں پنجاب دی ذریعہ تعلیم،سرکاری،دفتری تے عدالتی زبان دے طور اُتے نافذ کرے تے مقصد لئی صوبے وچ پنجابی لینگوئج ایکٹ نافذکرے۔تقریب وچ ہر شعبہ توں تعلق رکھن والیاں دی وڈھی تعداد موجود سی تقریب وچ معروف گلوکاراں جنہاں وچ ندیم اقبال باہو صابر ورک ۔ممتاز رفیع ۔فہیم عباس ۔خدام علی تے وقار عظیم نے عارفانہ کلام گایا تے لوکاں نے بھرپور سراہا ۔تقریب دے آخر وچ پروہنیاں نوں پر تکلف افطار ڈنر وی دتا گیا۔