وزیراعلی پنجاب نے آئی ٹی ذریعے گورننس، سروس ڈلیوری دی بہتری لئی ٹاسک دے دتا

لہور(پنجابی میڈیا)وزیراعلی پنجاب مریم نواز شریف ولوں صوبہ وچ آئی ٹی ذریعے گورننس، سروس ڈلیوری بہتر بنان دا ٹاسک دے دتا گیا۔چیف سیکرٹری پنجاب نے ساریاں محکمیاں، کمشنراں تے ڈپٹی کمشنراں نوں 3مہینے دی ڈیڈ لائن دے دتی، ہر محکمے توں عوام نوں فراہم کیتی جان والی خدمات دی تفصیلات تے اونہاں دی آسان آن لائن رسائی یقینی بنان بارے تجویز منگ لئی گئی۔چیف سیکرٹری پنجاب زاہد اختر زمان دی زیر صدارت سول سیکرٹریٹ وچ سیکرٹریاں دی کانفرنس ہوئی، جس وچ چیف سیکرٹری نے آکھیا کہ آئی ٹی دے استعمال نال عوام لئی خدمات دی فراہمی نوںآسان بنایا جائے گا۔زاہد اختر زمان نے آکھیا کہ خدمات دی آن لائن فراہمی نال شہریاں نوں سرکاری دفتر دے چکر لان توں نجات ملے گی۔