بیساکھی محبت تے خوشیاں وَنڈن دا تہوار اے، شہبازشریف

لہور(پنجابی میڈیا) وزیراعظم محمد شہباز شریف نے آکھیا اے کہ بیساکھی دے رنگا رنگ تہوار اُتے دنیا بھر تے پاکستان وچ وَسن والی سکھ برادری نوں دل دیاں گہرائیاں نال مبارکباد پیش کردا ہاں۔اپنے پیغام وچ وزیر اعظم شہباز شریف نے آکھیا کہ دیسی مہینہ بیساکھ بہار دے موسم دی علامت تے بیساکھی پیار ،محبت تے خوشیاں وَنڈن داتہوار اے۔ ساہنوں فخر اے کہ پاکستان مختلف عقائد تے ثقافتاں دا اک خوبصورت امتزاج اے،بیساکھی دے رنگ اوس دی خوبصورتی وچ ہور اضافہ کردے نیں ،اونہاں نے آکھیا کہ حکومت پاکستان تے ساریاں صوبائی حکومتاں ایس امرنوں یقینی بنا رہیاں نیں کہ بیساکھی دیاں رسماں ادا کرن لئی پاکستان وچ موجود مذہبی مقاماں دا دورہ کرن والے دنیا بھر توں آئے سکھ یاتریاں نوں ساریاں سہولتاں فراہم کیتیاں جان۔بیساکھی دے موقع اُتے میں تہانوں ساریاںنوں پیار، محبت تے امن دا پیغام دینا چاہندا ہاں،آو مل کے اک پُرامن دنیادی تشکیل وچ اپنا کردار ادا کرن۔